Shókeev qyzdar mektebin ashýdy kózdegen ananyń jobasyn qoldady
Oblys basshysynyń qabyldaýyna kelgen kóp balaly ana Toilybaeva Uljan ataýly áleýmettik kómek alý máselesine toqtaldy. Sondai-aq, baspanaǵa qol jetkize almai júrgenin jetkizgen azamatsha kómek suraidy.
– Biz sizdiń jaǵdaiyńyzdy túsinip otyrmyz. Bul máseleni sheshýge tyrysamyz. Alaida, siz eń aldymen úi kezegine turýyńyz qajet, – dedi óńir basshysy.
Atalǵan azamatqa jumyspen qamtýdy úilestirý jáne áleýmettik baǵdarlamalar basqarmasy arqyly tiisinshe qoldaý kórsetiledi.
Al muǵalim M.Israilova ulttyq baǵytta bilim beretin qyzdar mektebin ashýdy armandaidy. Batyr ana óz maqsatyn júzege asyrý jolynda ǵimarat surap arnaiy ákimniń qabyldaýyna kelgen.
– Sizdiń ideiańyz unady. Qazir Túrkistanda neke saraiy salynyp jatyr. Osy ǵimaratty baryp kórip, unaǵan bólmeden úiirme ashýyńyzǵa bolady. Men Qyzdar mektebin ashý, ulttyq baǵytta tárbie beretin úiirme ashý boiynsha jan-jaqty kómek kórsetemin, – dedi Ó. Shókeev.
Oblystyq áielder keńesiniń tóraiymy B. Jandosova oblysta respýblikalyq «Ónege» jobasynyń jumysyn jandandyryp, Túrkistannan turmystyq zorlyq-zombylyqqa ushyraǵan azamattarǵa arnalǵan daǵdarys ortalyǵyn ashsaq degen ideiasymen bólisti. Áleýmettik mańyzy zor bastamaǵa oblys basshysy qoldaý bildiretindigin jetkizdi.
Aita keteiik, «Nur Otan» partiiasy Túrkistan oblystyq filialynyń «Open space» formatynda ashylǵan Qoǵamdyq qabyldaý keńsesine barlyq memlekettik organ jetekshileri, oblys ákimi, basqarma basshylary ai saiyn kelip, turǵyndarmen qabyldaý júrgizýde.
«Nur Otan» partiiasy Túrkistan oblystyq filialynyń baspasóz qyzmeti
