Shymkentte zamanaýi «Fontan» akvaparki ashyldy
Búgin Shymkent qalasynda «Fontan» akvaparki ashyldy. Saltanatty jiynǵa Ońtústik Qazaqstan oblysynyń ákimi Janseiit Túimebaev qatysyp, qala qonaqtary men turǵyndaryn quttyqtady.
– Mine, barshamyz qýanyshty oqiǵanyń kýási bolyp otyrmyz. Jańadan ashylyp otyrǵan zamanaýi akvapark barlyq talapqa sai etip jasalǵan. Búginde qalamyzda halyqtyń tynyǵyp, demalýyna arnalǵan oryndar kóbeiip keledi. Máselen, jýyrda ǵana qalany qaqa jaryp aǵatyn Qoshqar ata ózeniniń boiyn abattandyrylyp, sýǵa shomylýǵa arnalǵan oryndar paida boldy. Mundai jumystar áli de jasǵasyn tabatyn bolady, – dedi Janseiit Qanseiituly.
Akvapark 2 gektar aýmaqty alyp jatyr. Onda biikten syrǵanaityn 8 tóbeshik ornalasqan. Onyń 2-eýi biiktigi 22 metrdi quraityn elimizdegi eń biik tóbeshik bolsa, TMD elderi arasynda eń uzyn tóbeshik te osynda boi kótergen. Aita keteiik, «FONTAN» akvaparki Orta Aziiadaǵy eresekter men balalarǵa arnalǵan eń úlken sý qalashyǵy. Munda jasandy tolqyn jáne basseiin sýyn jylytýǵa arnalǵan qurylǵylar ornatylǵan.
Kásipkerdiń aitýynsha, demalys aimaǵynda 200-ge jýyq adam jumyspen qamtylǵan. Táýligine 2 myńnan astam kelýshige qyzmet kórsetýge qaýqarly.
Shara barysynda balalarǵa arnalǵan oiyn-saýyq baǵdarlama men utys oiyndary uiymdastyryldy. Kesh sońy Qazaqstannyń estrada juldyzdarynyń qatysýymen kontserttik baǵdarlamaǵa ulasty.
