Shymkentte qyzǵa zorlyq kórsetti degen kúdikpen birneshe adam ustaldy, dep habarlaidy Dalanews.kz.
Politsiianyń málimetinshe, atalǵan oqiǵa boiynsha birden qylmystyq is qozǵalyp, oqiǵaǵa qatysy bar barlyq azamat anyqtalǵan. Qazirgi tańda kúdiktiler qamaýǵa alynǵan.
"Tergeý jalǵasyp jatyr. Sonymen qatar sotqa deiingi tergeý aiasynda jábirlenýshilerdiń esirtki zattarynyń zańsyz ainalymyna qatysy bolýy múmkin degen aqparat ta tekserilýde", – dep málimdedi Shymkent qalalyq politsiia departamentiniń baspasóz qyzmeti.
Eske salaiyq, buǵan deiin áleýmettik jelide jas jigit pen qyzdyń soqqyǵa jyǵylyp, qorlyq kórgeni túsirilgen video taraǵan edi. Jelide taraǵan aqparatqa sáikes, qyz jynystyq zorlyqqa da ushyraǵan bolýy múmkin. Al oqiǵanyń esirtki biznesine qatysy bar adamdardyń tapsyrmasymen jasalǵany aitylýda.
