Shymkent qalasynda Eńbekshi aýdandyq jergilikti polısıa qyzmeti bastyǵynyń orynbasary zorlaý isi boıynsha kúdikke ilindi,- dep habarlaıdy Dalanews.kz 

Oqıǵaǵa qatysty Shymkent qalalyq polısıa departamentiniń baspasóz qyzmeti túsinikteme berdi. Vedomstvo áıeldiń aryzy boıynsha qylmystyq is qozǵalǵanyn rastady.

Qazir isti Túrkistan aýdandyq polısıa basqarmasy tergep jatyr. Tergeý aıasynda birqatar saraptama taǵaıyndalyp, tergeý áreketteri júrgizilýde.

Polısıa departamenti aldyn ala málimetke súıene otyryp, aryzdanýshy men kúdiktiniń arasynda buryn jaqyn qarym-qatynas bolǵanyn atap ótti.

«Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan tergeý sharalary júrgizilip jatyr. Tergeý nátıjeleri boıynsha zańǵa sáıkes sheshim qabyldanady», – delingen polısıa málimdemesinde.

Áleýmettik jelilerde taraǵan aqparatta kúdiktiniń – Eńbekshi aýdandyq jergilikti polısıa qyzmeti bastyǵynyń orynbasary Erlan Jumanov ekeni aıtylyp jatyr. Sondaı-aq zorlandy dep aryz jazǵan áıeldiń — quqyq qorǵaý organdarynyń qyzmetkeri ekeni jáne qazir júktilik kezeńinde ekeni de jarıalanǵan.

Polısıa Qylmystyq-prosestik kodekstiń 201-babyna sáıkes, tergeý derekteri jarıalaýǵa jatpaıtynyn eske saldy.