20 qańtar kúni Shymkentte Erimbetov pen Rysqulov kósheleriniń qiylysynda jol-kólik oqiǵasy boldy. Apat arty jappai tóbeleske ulasyp, qaiǵyly jaǵdaimen aiaqtaldy, dep habarlaidy Dalanews.kz.
Aldyn ala málimet boiynsha, Toyota Camry kóligi baǵdarshamnyń qyzyl túsinde toqtap turǵan Hyundai Sonata avtokóligimen soqtyǵysqan. Hyundai tizgininde qala turǵyny, 34 jastaǵy N.Eshanqulov bolǵan.
Jol apatynan keiin er adamdar arasynda janjal shyqqan. Toyota Camry ishindegi adamdarǵa Lexus LX 570 kóligimen kelgen taǵy tórt belgisiz azamat qosylǵan. Aýyzsha kikiljiń tóbeleske ulasyp, onyń barysynda M.Kóshkenbaevtyń moinyna pyshaqpen suǵylǵan-kesilgen jaraqat salynǵan. Ol aýrýhanaǵa jetkizildi. Sonymen qatar N.Eshanqulov pen V.Kolesnikov ta dene jaraqatyn alǵan.
Oqiǵadan keiin belgisiz adamdar V.Kolesnikovty kúshtep Toyota Camry kóligine otyrǵyzyp alyp ketken. Keiin politsiia qyzmetkerleri Camry men Lexus avtokólikterin taýyp, jábirlenýshiniń VAZ-2114 kóligine aýystyrylyp, Ordabasy aýdany baǵytyna áketilgenin anyqtaǵan.
Keshki saǵat 19:00 shamasynda Temirlanovka aýylyndaǵy ortalyq aýdandyq aýrýhananyń mańynan V.Kolesnikovtyń denesi túrli dene jaraqattarymen tabyldy.
Qazirgi ýaqytta quqyq qorǵaý organdary kúdiktilerdi anyqtaý jáne ustaý boiynsha jedel-izdestirý sharalaryn júrgizip jatyr. Sondai-aq VAZ-2114 avtokóligine izdeý jariialandy. Oqiǵanyń barlyq mán-jaiy anyqtalýda.
