20 قاڭتار كۇنى شىمكەنتتە ەرىمبەتوۆ پەن رىسقۇلوۆ كوشەلەرىنىڭ قيىلىسىندا جول-كولىك وقيعاسى بولدى. اپات ارتى جاپپاي توبەلەسكە ۇلاسىپ، قايعىلى جاعدايمەن اياقتالدى، دەپ حابارلايدى Dalanews.kz.

الدىن الا مالىمەت بويىنشا، Toyota Camry كولىگى باعدارشامنىڭ قىزىل تۇسىندە توقتاپ تۇرعان Hyundai Sonata اۆتوكولىگىمەن سوقتىعىسقان. Hyundai تىزگىنىندە قالا تۇرعىنى، 34 جاستاعى ن.ەشانقۇلوۆ بولعان.

جول اپاتىنان كەيىن ەر ادامدار اراسىندا جانجال شىققان. Toyota Camry ىشىندەگى ادامدارعا Lexus LX 570 كولىگىمەن كەلگەن تاعى ءتورت بەلگىسىز ازامات قوسىلعان. اۋىزشا كيكىلجىڭ توبەلەسكە ۇلاسىپ، ونىڭ بارىسىندا م.كوشكەنبايەۆتىڭ موينىنا پىشاقپەن سۇعىلعان-كەسىلگەن جاراقات سالىنعان. ول اۋرۋحاناعا جەتكىزىلدى. سونىمەن قاتار ن.ەشانقۇلوۆ پەن ۆ.كولەسنيكوۆ تا دەنە جاراقاتىن العان.

وقيعادان كەيىن بەلگىسىز ادامدار ۆ.كولەسنيكوۆتى كۇشتەپ Toyota Camry كولىگىنە وتىرعىزىپ الىپ كەتكەن. كەيىن پوليسيا قىزمەتكەرلەرى Camry مەن Lexus اۆتوكولىكتەرىن تاۋىپ، جابىرلەنۋشىنىڭ ۆاز-2114 كولىگىنە اۋىستىرىلىپ، ورداباسى اۋدانى باعىتىنا اكەتىلگەنىن انىقتاعان.

كەشكى ساعات 19:00 شاماسىندا تەمىرلانوۆكا اۋىلىنداعى ورتالىق اۋداندىق اۋرۋحانانىڭ ماڭىنان ۆ.كولەسنيكوۆتىڭ دەنەسى ءتۇرلى دەنە جاراقاتتارىمەن تابىلدى.

قازىرگى ۋاقىتتا قۇقىق قورعاۋ ورگاندارى كۇدىكتىلەردى انىقتاۋ جانە ۇستاۋ بويىنشا جەدەل-ىزدەستىرۋ شارالارىن جۇرگىزىپ جاتىر. سونداي-اق ۆاز-2114 اۆتوكولىگىنە ىزدەۋ جاريالاندى. وقيعانىڭ بارلىق ءمان-جايى انىقتالۋدا.