Shymkentte ornatylǵan smart-dárethanalar kei azamattardyń jaýapsyz áreketterinen búlinip jatyr. Qalanyń sanitarlyq jaǵdaiyn jaqsartyp, turǵyndar úshin qolaily orta qalyptastyrý maqsatynda qoiylǵan nysandardy ádeii syndyrý, ishindegi jabdyqtardy jaramsyz etý jaǵdailary jiilep ketken, dep habarlaidy Dalanews.kz agenttigi Sn.kz-ke silteme jasap.
Jaýapty mamandardyń málimetinshe, qoǵamdyq ájethanalarda gúlderdi julyp ketý, káriz júiesin bitep tastaý, tehnikalyq qurylǵylardy qasaqana zaqymdaý siiaqty áreketter jii kezdesedi. Munyń barlyǵy jobany júzege asyryp otyrǵan tarapqa aitarlyqtai materialdyq shyǵyn keltirip jatyr.
Sońǵy oqiǵa kezinde eki belgisiz adam ájethana ishindegi tehnikany ádeii isten shyǵarǵan. Olar fendi symymen qosa julyp alyp, nysannyń qalypty jumysyn toqtatýǵa sebep bolǵan. Joba menedjeri Milana Peremitinanyń aitýynsha, bul jai ǵana abaisyzdyq emes, qasaqana jasalǵan áreket.
Atalǵan jaǵdai boiynsha joba qyzmetkerleri politsiiaǵa aryz túsirgen. Qazir quqyq qorǵaý organdary oqiǵanyń mán-jaiyn anyqtap jatyr.
Aita keteiik, mundai jaǵdailar Shymkentte buryn da tirkelgen. Ótken jyly Arbat aýmaǵynda belgisiz bireý qoǵamdyq oryndardyń esikterin ádeii bitep tastaǵan bolatyn. Keiin kúdikti ustalǵan. Al biylǵy jyl qoǵamdyq múlikti búldirý derekterimen bastalyp otyr.
Mamandardyń aitýynsha, bir smart-dárethanany ornatýǵa shamamen 50 million teńge jumsalǵan. Sondyqtan kez kelgen búlingen jabdyq qala biýdjeti men jobany iske asyrýshylar úshin úlken shyǵyn sanalady.
Osyǵan bailanysty joba avtorlary men qala biligi turǵyndar men qala qonaqtaryn ortaq múlikke uqypty qaraýǵa shaqyryp otyr. Óitkeni qoǵamdyq nysandardyń saqtalýy eń aldymen qoǵamnyń jaýapkershiligine bailanysty.
