Shymkenttik belsendi Nazıra Júrgenbaeva Jalpyulttyq sosıal-demokratıalyq partıasynyń Almaty oblystyq fılıalynyń jetekshisi Nurym Nurlybekovke qatysty quqyq qorǵaý organdaryna aryz berdi. Alaıda polısıa onyń ótinishin qaraýsyz qaldyryp, nomenklatýralyq iske jibergen. Bul týraly Feminita bastamasy Facebook-tegi paraqshasynda málimdedi, dep habarlaıdy Dalanews.kz.
Oqıǵa neden bastaldy?
5 jeltoqsanda Nurlybekov áleýmettik jelide LGBT ókilderine qatysty “bárin atyp tastar edim” degen mazmundaǵy jazba qaldyrǵan. Onyń bul áreketi qoǵamda úlken rezonans týdyryp, birqatar uıym fılıal jetekshisin qylmystyq jaýapkershilikke tartý týraly bastama kóterdi.
Uıymdardyń pikirinshe, Nurlybekovtiń sózi zorlyq-zombylyqty nasıhattaıdy jáne áleýmettik arazdyqty qozdyrý belgilerin qamtıdy.
Aryz bergennen keıingi jaǵdaı
Nazıra Júrgenbaeva Nurlybekovke qatysty aryzdy Birińǵaı sotqa deıingi tergep-tekserý tiziliminiń ashyq sektorynda onlaın túrde joldaǵan. Aryz tirkelgennen keıin 30–40 mınýt ishinde belsendiniń úıine ýchaskelik polısıa ınspektory barǵan. Feminita málimetinshe, ınspektor aryzdy keri qaıtaryp, ony “jaýap berýshiniń turǵylyqty jerine jiberýdi” usynǵan. Onyń sózinshe, polısıa Nurlybekovti Almatydan Shymkentke shaqyra almaıdy.
Belsendi aryzdy qaıtaryp alýdan bas tartqan soń, oqıǵa ornyna tergeý toby kelip, odan túsinikteme talap etken.
Aryz qaraýsyz qaldy
Aryz tirkelgennen keıin 18 saǵat ótken soń, Júrgenbaeva 1414 qyzmeti arqyly Shymkent polısıasynan resmı jaýap alǵan. Onda aryz boıynsha bastapqy tekseris júrgizilgeni, alaıda “aryz qaraýsyz qaldyrylyp, nomenklatýralyq is retinde tirkelgeni” habarlanǵan.
Belsendi jarıalaǵan aqparatqa sáıkes, aryz mártebesin ERDR portalynan tekserý múmkin bolmaǵan, júıe 504 jáne 401 qatelikterin kórsetken. Sonymen qatar aryzdy qabyldaǵan tergeýshi qońyraýlar men habarlamalarǵa jaýap bermegen.
Feminita pikiri
Feminita mundaı sheshimniń birneshe mańyzdy aspektisin atap ótti:
• aryz qabyldanyp, tirkelgen;
• alaıda naqty tergeý bastalmaǵan;
• belsendini aryzyn keri qaıtarýǵa ıtermeleý áreketteri bolǵan;
• is resmı túrde arhıvke jiberilgen.
Uıym ókilderiniń aıtýynsha, polısıanyń bul áreketi Qylmystyq is júrgizý kodeksiniń normalaryn buzady. Sebebi aryz boıynsha tolyq tekseris júrgizilip, quqyqtyq baǵa berilýi tıis. “Nomenklatýralyq iske jiberý” – tergeý júrgizýden faktilik bas tartý retinde baǵalanýda.
Feminita bul jaǵdaıdy “polısıanyń jáne memleket júıesiniń azamattardy qorǵaý mindetin oryndamaýynyń belgisi” dep atady. Uıymnyń pikirinshe, eger memlekettik organdar jarıa túrde aıtylǵan ólim qaterin durys qaramasa, bul – qate emes, júıelik salǵyrttyqtyń kórinisi.
Belsendiniń áreketi
Feminita belsendiniń aryzdan bas tartpaǵanyn, polısıanyń kelýin tirkegenin jáne resmı jaýap alǵanyn atap ótti.
