شىمكەنتتىك بەلسەندى نازيرا جۇرگەنبايەۆا جالپىۇلتتىق سوسيال-دەموكراتيالىق پارتياسىنىڭ الماتى وبلىستىق فيليالىنىڭ جەتەكشىسى نۇرىم نۇرلىبەكوۆكە قاتىستى قۇقىق قورعاۋ ورگاندارىنا ارىز بەردى. الايدا پوليسيا ونىڭ ءوتىنىشىن قاراۋسىز قالدىرىپ، نومەنكلاتۋرالىق ىسكە جىبەرگەن.  بۇل تۋرالى Feminita باستاماسى Facebook-تەگى پاراقشاسىندا مالىمدەدى، دەپ حابارلايدى Dalanews.kz.

وقيعا نەدەن باستالدى؟

5 جەلتوقساندا نۇرلىبەكوۆ الەۋمەتتىك جەلىدە لگبت وكىلدەرىنە قاتىستى “ءبارىن اتىپ تاستار ەدىم” دەگەن مازمۇنداعى جازبا قالدىرعان. ونىڭ بۇل ارەكەتى قوعامدا ۇلكەن رەزونانس تۋدىرىپ، ءبىرقاتار ۇيىم فيليال جەتەكشىسىن قىلمىستىق جاۋاپكەرشىلىككە تارتۋ تۋرالى باستاما كوتەردى. 

ۇيىمداردىڭ پىكىرىنشە، نۇرلىبەكوۆتىڭ ءسوزى زورلىق-زومبىلىقتى ناسيحاتتايدى جانە الەۋمەتتىك ارازدىقتى قوزدىرۋ بەلگىلەرىن قامتيدى.

ارىز بەرگەننەن كەيىنگى جاعداي

نازيرا جۇرگەنبايەۆا نۇرلىبەكوۆكە قاتىستى ارىزدى ءبىرىڭعاي سوتقا دەيىنگى تەرگەپ-تەكسەرۋ ءتىزىلىمىنىڭ اشىق سەكتورىندا ونلاين تۇردە جولداعان. ارىز تىركەلگەننەن كەيىن 30–40 مينۋت ىشىندە بەلسەندىنىڭ ۇيىنە ۋچاسكەلىك پوليسيا ينسپەكتورى بارعان. Feminita مالىمەتىنشە، ينسپەكتور ارىزدى كەرى قايتارىپ، ونى “جاۋاپ بەرۋشىنىڭ تۇرعىلىقتى جەرىنە جىبەرۋدى” ۇسىنعان. ونىڭ سوزىنشە، پوليسيا نۇرلىبەكوۆتى الماتىدان شىمكەنتكە شاقىرا المايدى.

بەلسەندى ارىزدى قايتارىپ الۋدان باس تارتقان سوڭ، وقيعا ورنىنا تەرگەۋ توبى كەلىپ، ودان تۇسىنىكتەمە تالاپ ەتكەن.

ارىز قاراۋسىز قالدى

ارىز تىركەلگەننەن كەيىن 18 ساعات وتكەن سوڭ، جۇرگەنبايەۆا 1414 قىزمەتى ارقىلى شىمكەنت پوليسياسىنان رەسمي جاۋاپ العان. وندا ارىز بويىنشا باستاپقى تەكسەرىس جۇرگىزىلگەنى، الايدا “ارىز قاراۋسىز قالدىرىلىپ، نومەنكلاتۋرالىق ءىس رەتىندە تىركەلگەنى” حابارلانعان.

بەلسەندى جاريالاعان اقپاراتقا سايكەس، ارىز مارتەبەسىن ERDR پورتالىنان تەكسەرۋ مۇمكىن بولماعان، جۇيە 504 جانە 401 قاتەلىكتەرىن كورسەتكەن. سونىمەن قاتار ارىزدى قابىلداعان تەرگەۋشى قوڭىراۋلار مەن حابارلامالارعا جاۋاپ بەرمەگەن.

Feminita پىكىرى

Feminita مۇنداي شەشىمنىڭ بىرنەشە ماڭىزدى اسپەكتىسىن اتاپ ءوتتى:

• ارىز قابىلدانىپ، تىركەلگەن؛

• الايدا ناقتى تەرگەۋ باستالماعان؛

• بەلسەندىنى ارىزىن كەرى قايتارۋعا يتەرمەلەۋ ارەكەتتەرى بولعان؛

• ءىس رەسمي تۇردە ارحيۆكە جىبەرىلگەن.

ۇيىم وكىلدەرىنىڭ ايتۋىنشا، پوليسيانىڭ بۇل ارەكەتى قىلمىستىق ءىس جۇرگىزۋ كودەكسىنىڭ نورمالارىن بۇزادى. سەبەبى ارىز بويىنشا تولىق تەكسەرىس جۇرگىزىلىپ، قۇقىقتىق باعا بەرىلۋى ءتيىس. “نومەنكلاتۋرالىق ىسكە جىبەرۋ” – تەرگەۋ جۇرگىزۋدەن فاكتىلىك باس تارتۋ رەتىندە باعالانۋدا.

Feminita بۇل جاعدايدى “پوليسيانىڭ جانە مەملەكەت جۇيەسىنىڭ ازاماتتاردى قورعاۋ مىندەتىن ورىنداماۋىنىڭ بەلگىسى” دەپ اتادى. ۇيىمنىڭ پىكىرىنشە، ەگەر مەملەكەتتىك ورگاندار جاريا تۇردە ايتىلعان ءولىم قاتەرىن دۇرىس قاراماسا، بۇل – قاتە ەمەس، جۇيەلىك سالعىرتتىقتىڭ كورىنىسى.

بەلسەندىنىڭ ارەكەتى

Feminita بەلسەندىنىڭ ارىزدان باس تارتپاعانىن، پوليسيانىڭ كەلۋىن تىركەگەنىن جانە رەسمي جاۋاپ العانىن اتاپ ءوتتى.