Ekinshi dúniejúzilik soǵysqa Shyǵys Qazaqstannan 180 myń sarbaz attansa, solardyń 83 myńy úiine joq. Iá, soǵystyń jazylmaǵan zańy bul. Júzdegen, myńdaǵan otbasynyń sharpyp ótti osynaý zulmat.
Shyǵys Qazaqstannan maidanǵa attanǵan jaýyngerler uly Jeńiske orasan úles qosty.
109 adam Keńes Odaǵynyń Batyry ataǵyn aldy. 24 adam Dańq ordenin ielendi. 9 myńǵa tarta jaýynger "Uly Otan soǵysyndaǵy erligi úshin" medalimen marapattaldy.
Búgingi kúni oblystaǵy 178 kóshe men 66 eldi-meken Shyǵystan shyqqan Keńes odaǵy batyrlarynyń atymen atalady.
16 kóshe men 9 eldi-mekenniń aty "Dańq" ordeniniń iegerlerine berilgen.
Bulardyń arasynda – Qasym Qaisenov, Fedor Kokorin, Izgutty Aityqov, Aleksei Chernov, Vladimir Myza, Tólegen Toqtarov, Lev Roshin siiaqty aty ańyzǵa ainalǵan tulǵalar bar.
Biyl Ekinshi dúniejúzilik soǵystyń aiaqtalǵanyna 74 jyl toldy. Ýaqyt alǵa ozǵan saiyn osynaý Jeńiske atsalysqan ardagerlerdiń qatary seldirep keledi.
Byltyrǵy jyly Uly Otan soǵysyna qatysqan 240 ardagerlerdi quttyqtap, syi-qurmet kórsetken edik. Biyl olardyń qatary 179 maidangerge deiin kemigen eken. Olardyń 64-i Óskemende, 39-y Semei qalasynda turady.
Ardagerlerimiz Shyǵys Qazaqstan aýmaǵynda ótkiziletin kóptegen mańyzdy is-sharalardyń qurmetti qonaǵy. Ótkensiz bolashaq joq, erlik eldiń esinde bolýy tiis. Otanyn jaýdan qorǵaǵan jaýjúrek azamattardyń aldynda búgingi býyn máńgi baqi qaryzdar.
Osy oraida Ekinshi Dúniejúzilik soǵystyń aiaqtalǵanyna 74 jyl tolýyna orai oblys basshylyǵy soǵys ardagerlerine 301 mln. teńge kóleminde materialdyq kómek kórsetti.
Soǵysqa qatysqan shyǵysqazaqstandyq árbir maidangerge 542 myń 875 teńge kóleminde ótemaqy tólendi.
Budan bólek óńirdegi marapaty bar 576 tyl eńbekkerleri syi-siiapatqa bólenip, olarǵa 63 125 teńge syiaqy berildi. Tutastai alǵanda atalǵan sanat boiynsha azamattarǵa materialdyq kómek kórsetýge oblys biýdjetinen 36,4 mln. teńge bólindi.
Marapaty bolmasa da osynaý Jeńiske úlken úles qosqan 16 myń tyl eńbekkerleri de nazardan qalys qalǵan joq. Olarǵa jalpy somasy 155,4 mln teńge materialdyq kómek kórsetildi.
Shyǵysqazaqstandyq ardagerlerdiń densaýlyǵy da jiti nazarda, olar arnaiy demalys oryndarynda tegin demalýy múmkindigine ie. Budan tys ardagerler arnaiy áleýmettik qyzmet kórsetetin 8 ortalyqta dárigerlerlik-áleýmettik kómek alyp otyr. Jyl saiyn soǵys ardagerleri men tyl ardagerleri "Ýba" sanatoriinde emdik kýrstan ótedi. Biyl bul jerge 69 tyl eńbekkeri joldama alyp, kúsh-qýat jinap qaitty.
Ardagerlerge jasalar jaqsylyq munymen shektelip qalmaq emes. Oblys deńgeiinde aldaǵy ýaqytta ózge de mańyzdy jobalar júzege asatyn bolady.
Aiaýlym ShAIMARDAN
Shyǵys Qazaqstan oblysy
