Bailanys, internet, jaldaý aqysy jáne basqa da qyzmetter tarifi qymbattaýy kásipkerlerge salmaq túsirip otyr. Osyǵan bailanysty premer-ministrdiń orynbasary - ulttyq ekonomika ministri Serik Jumanǵarin biznes ókilderine shyǵynyn qaita qaraýǵa keńes berdi, dep habarlaidy Dalanews.kz.
"Qazir Úkimette shyǵyndardy ońtailandyrýmen ainalysyp jatyrmyz. Arnaiy jumys toby qurylǵan, ony ózim basqaramyn. Sondyqtan biznes te óz shyǵynyn ońtailandyrýy qajet", - dedi Serik Jumanǵarin.
Ministrdiń sózinshe, elektr energiiasy tarifiniń alǵashqy 30 paiyzdyq ósimin energiia únemdeý sharalary arqyly óteýge bolady. Mysaly energiia únemdeitin shamdardy paidalaný shyǵyndy azaitýǵa kómektesedi.
Sondai-aq, ol salyq reformasy syrtqy naryqtaǵy turaqsyzdyq kezeńimen tuspa-tus kelgenin atap ótti. Bul logistika men baǵaǵa áser etip otyr. Degenmen, Serik Jumanǵarinniń aitýynsha, bizneske qolaily rejimderdiń basym bóligi saqtalǵan, al salyqtan jaltarýǵa múmkindik beretin tetikter joiylǵan.
Sonymen qatar, Serik Jumanǵarin Qazaqstanda azyq-túlik qymbattaýy tek qosylǵan qun salyǵy (QQS) ósýimen bailanysty emes ekenin málimdedi.
Onyń aitýynsha, baǵa ósýine birneshe faktor áser etip otyr. Birinshiden, Qazaqstan ózin-ózi azyq-túlikpen tolyq qamtamasyz ete almaidy. Ekinshiden, álemdik naryqta baǵa ósip jatyr. Sonymen qatar, otandyq fermerler ónimderin eksportqa shyǵarýǵa múddeli, bul ishki naryqtaǵy usynysqa yqpal etedi.
