بايلانىس، ينتەرنەت، جالداۋ اقىسى جانە باسقا دا قىزمەتتەر ءتاريفى قىمباتتاۋى كاسىپكەرلەرگە سالماق ءتۇسىرىپ وتىر. وسىعان بايلانىستى پرەمەر-مينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين بيزنەس وكىلدەرىنە شىعىنىن قايتا قاراۋعا كەڭەس بەردى، دەپ حابارلايدى Dalanews.kz.
"ءقازىر ۇكىمەتتە شىعىنداردى وڭتايلاندىرۋمەن اينالىسىپ جاتىرمىز. ارنايى جۇمىس توبى قۇرىلعان، ونى ءوزىم باسقارامىن. سوندىقتان بيزنەس تە ءوز شىعىنىن وڭتايلاندىرۋى قاجەت"، - دەدى سەرىك جۇمانعارين.
ءمينيستردىڭ سوزىنشە، ەلەكتر ەنەرگياسى ءتاريفىنىڭ العاشقى 30 پايىزدىق ءوسىمىن ەنەرگيا ۇنەمدەۋ شارالارى ارقىلى وتەۋگە بولادى. مىسالى ەنەرگيا ۇنەمدەيتىن شامداردى پايدالانۋ شىعىندى ازايتۋعا كومەكتەسەدى.
سونداي-اق، ول سالىق رەفورماسى سىرتقى نارىقتاعى تۇراقسىزدىق كەزەڭىمەن تۇسپا-تۇس كەلگەنىن اتاپ ءوتتى. بۇل لوگيستيكا مەن باعاعا اسەر ەتىپ وتىر. دەگەنمەن، سەرىك ءجۇمانعاريننىڭ ايتۋىنشا، بيزنەسكە قولايلى رەجيمدەردىڭ باسىم بولىگى ساقتالعان، ال سالىقتان جالتارۋعا مۇمكىندىك بەرەتىن تەتىكتەر جويىلعان.
سونىمەن قاتار، سەرىك جۇمانعارين قازاقستاندا ازىق-تۇلىك قىمباتتاۋى تەك قوسىلعان قۇن سالىعى (ققس) وسۋىمەن بايلانىستى ەمەس ەكەنىن مالىمدەدى.
ونىڭ ايتۋىنشا، باعا وسۋىنە بىرنەشە فاكتور اسەر ەتىپ وتىر. بىرىنشىدەن، قازاقستان ءوزىن-وزى ازىق-تۇلىكپەن تولىق قامتاماسىز ەتە المايدى. ەكىنشىدەن، الەمدىك نارىقتا باعا ءوسىپ جاتىر. سونىمەن قاتار، وتاندىق فەرمەرلەر ونىمدەرىن ەكسپورتقا شىعارۋعا مۇددەلى، بۇل ىشكى نارىقتاعى ۇسىنىسقا ىقپال ەتەدى.
