Qazaqstanda Qańtar oqiǵasynan keiin qurylǵan "zańsyz shyǵarylǵan qarjyny qaitarý boiynsha" arnaiy komissiia 2022 jyldyń alty aiynda elge 631 milliard teńge qaitarylǵanyn málimdedi.
Komissiia málimetine qaraǵanda, bul somanyń 421 mlrd teńgesi qylmystyq ister boiynsha keltirilgen shyǵyndardyń ornyn toltyrý aiasynda qaitarylǵan. Onyń ishinde 314 mlrd aqshalai túrde, 107 mlrd teńge baǵaly tastar jáne metalldar túrinde kelgen.
Qalǵan qarjy monopoliiadan shyǵarý boiynsha isterdiń aiasynda qaitarylǵan.
Komissiia málimdemesinde zańsyz qarjyny shyǵarýǵa qatysy bar degen kompaniialardyń jáne jeke adamdardyń aty-jóni aitylǵan emes.
"Shet elge zańsyz shyǵarylǵan qarjyny qaitarý boiynsha" komissiia qurylǵanyn prezident biyl 5 maýsymda Konstitýtsiiany ózgertý boiynsha referendým ótken kúni bildirgen.
Komissiia quramynda quqyq qorǵaý organdarynyń, arnaiy jáne ortalyq atqarý organdarynyń, Ulttyq bank, Qarjy naryǵyn baqylaý agenttiginiń, fiskaldyq organdardyń jáne "Samruq-Qazyna" qorynyń jetekshileri kirgen.
Qańtar oqiǵasynan keiin Toqaev el bailyǵynyń kóbine ielik etip kelgen adamdardyń toby jóninde birneshe ret aitqan.
Tax justice network uiymynyń málimetine qaraǵanda, sońǵy 25 jyl ishinde Qazaqstannan sheteldik ofshorlorǵa 140-160 milliard dollarǵa jaqyn aqsha shyǵarylǵan. Keibir sarapshylar syrtqa shyǵarylǵan aqsha budan da kóp bolýy múmkin ekenin aitady.
Shildede arnaiy komissiia shetelderge zańsyz aqsha shyǵarýǵa Nursultan Nazarbaevtyń qamaýdaǵy inisi Qairat Satybaldy, onyń áieli Gúlmira Satybaldy, Dariǵa Nazarbaevanyń burynǵy qudasy Qairat Boranbaev, sonymen birge eks-prezidenttiń kishi qyzy Áliia Nazarbaevaǵa tiesili ekeni aitylyp júrgen "Operator ROP" kompaniiasynyń jetekshileri kúdikti ekenin málimdegen.
Osyǵan deiin qoǵam tarapynan qurylǵan Elge Qaitaru qory burynǵy prezident Nursultan Nazarbaevtyń ainalasyndaǵy adamdardyń iri somadaǵy qarjysyn qaitarýyna kúmándanǵan.
Qazan aiynyń sońynda Eurasian Resources Group kompaniialar tobyna qylmystyq is qozǵaýdy talap etken. Ol toptyń direktorlar keńesinde Aleksandr Mashkevich, Patoh Shodiev jáne Shýhrat Ibragimov sekildi belgili oligarhtar bar.
https://dalanews.kz/bas-takyryp/84660-qazaqstan-atomnan-qol-uzgen-emes-ayes-t
