كوميسسيا مالىمەتىنە قاراعاندا، بۇل سومانىڭ 421 ملرد تەڭگەسى قىلمىستىق ىستەر بويىنشا كەلتىرىلگەن شىعىنداردىڭ ورنىن تولتىرۋ اياسىندا قايتارىلعان. ونىڭ ىشىندە 314 ملرد اقشالاي تۇردە، 107 ملرد تەڭگە باعالى تاستار جانە مەتاللدار تۇرىندە كەلگەن.
قالعان قارجى مونوپوليادان شىعارۋ بويىنشا ىستەردىڭ اياسىندا قايتارىلعان.
كوميسسيا مالىمدەمەسىندە زاڭسىز قارجىنى شىعارۋعا قاتىسى بار دەگەن كومپانيالاردىڭ جانە جەكە ادامداردىڭ ءاتى-جونى ايتىلعان ەمەس.
"شەت ەلگە زاڭسىز شىعارىلعان قارجىنى قايتارۋ بويىنشا" كوميسسيا قۇرىلعانىن پرەزيدەنت بيىل 5 ماۋسىمدا كونستيتۋسيانى وزگەرتۋ بويىنشا رەفەرەندۋم وتكەن كۇنى بىلدىرگەن.
كوميسسيا قۇرامىندا قۇقىق قورعاۋ ورگاندارىنىڭ، ارنايى جانە ورتالىق اتقارۋ ورگاندارىنىڭ، ۇلتتىق بانك، قارجى نارىعىن باقىلاۋ اگەنتتىگىنىڭ، فيسكالدىق ورگانداردىڭ جانە "سامرۇق-قازىنا" قورىنىڭ جەتەكشىلەرى كىرگەن.
قاڭتار وقيعاسىنان كەيىن توقايەۆ ەل بايلىعىنىڭ كوبىنە يەلىك ەتىپ كەلگەن ادامداردىڭ توبى جونىندە بىرنەشە رەت ايتقان.
Tax justice network ۇيىمىنىڭ مالىمەتىنە قاراعاندا، سوڭعى 25 جىل ىشىندە قازاقستاننان شەتەلدىك وفشورلورعا 140-160 ميلليارد دوللارعا جاقىن اقشا شىعارىلعان. كەيبىر ساراپشىلار سىرتقا شىعارىلعان اقشا بۇدان دا كوپ بولۋى مۇمكىن ەكەنىن ايتادى.
شىلدەدە ارنايى كوميسسيا شەتەلدەرگە زاڭسىز اقشا شىعارۋعا نۇرسۇلتان نازاربايەۆتىڭ قاماۋداعى ءىنىسى قايرات ساتىبالدى، ونىڭ ايەلى گۇلميرا ساتىبالدى، داريعا نازاربايەۆانىڭ بۇرىنعى قۇداسى قايرات بورانبايەۆ، سونىمەن بىرگە ەكس-پرەزيدەنتتىڭ كىشى قىزى ءاليا نازاربايەۆاعا تيەسىلى ەكەنى ايتىلىپ جۇرگەن "وپەراتور روپ" كومپانياسىنىڭ جەتەكشىلەرى كۇدىكتى ەكەنىن مالىمدەگەن.
وسىعان دەيىن قوعام تاراپىنان قۇرىلعان Elge Qaitaru قورى بۇرىنعى پرەزيدەنت نۇرسۇلتان نازاربايەۆتىڭ اينالاسىنداعى ادامداردىڭ ءىرى سوماداعى قارجىسىن قايتارۋىنا كۇماندانعان.
قازان ايىنىڭ سوڭىندا Eurasian Resources Group كومپانيالار توبىنا قىلمىستىق ءىس قوزعاۋدى تالاپ ەتكەن. ول توپتىڭ ديرەكتورلار كەڭەسىندە الەكساندر ماشكيەۆيچ، پاتوح شودييەۆ جانە شۋحرات يبراگيموۆ سەكىلدى بەلگىلى وليگارحتار بار.
https://dalanews.kz/bas-takyryp/84660-qazaqstan-atomnan-qol-uzgen-emes-ayes-t
