Taldyqorǵanda marqum Sherzat Bolattyń ólimine qatysty is boiynsha sot otyrysy jalǵasyp jatyr. Kezekti tyńdalymda qaiǵyly oqiǵa bolǵan túni jaraqat alǵan Nurqanat Ǵaiypbaevty teksergen sot-meditsinalyq sarapshy Ómirbek Jolymbetov kýálik berdi, dep habarlaidy Dalanews.kz.
Saraptama 2024 jyldyń 9 qazanynda júrgizilgen. Jolymbetovtiń aitýynsha, Ǵaiypbaevtyń denesinde túrli dene jaraqattary anyqtalǵan. Atap aitqanda, sol jaq kóziniń astynda 3 jáne 5 sm kóleminde kógergen qantalaý, oń qulaq tusynda – 2 jáne 1 sm shamasynda qantalaý bolǵan. Sondai-aq shúide bóliginde jumsaq tinderdiń qabynýy tirkelgen. Oń jambasynda 1,2 jáne 0,1 sm kólemindegi jara bolǵan.
Meditsinalyq qorytyndyda Ǵaiypbaevqa mynadai diagnoz qoiylǵan:
• Bas súiek-miynyń jabyq jaraqaty
• Bas miynyń shaiqalýy
• Mańdai jáne shúide tusyndaǵy jumsaq tinderdiń zaqymdanýy
• Keýde qýysynyń jabyq jaraqaty
• Oń jambastaǵy birneshe shanshyla kesilgen jaralar
• Oń tize býyny tinderiniń soǵylýy
Sarapshynyń aitýynsha, Ǵaiypbaevtyń jambasyna jasalǵan úsh shanshyla kesilgen jaraqat bir quralmen, qysqa ýaqyt aralyǵynda salynǵan. Bul jaralardyń arasy birneshe sekýndtan aspaǵan.
Alaida saraptama oqiǵadan bir apta ótken soń júrgizilgendikten, jaraqattyń naqty tereńdigin anyqtaý múmkindigi shekteýli bolǵan. Jolymbetov jaralardyń sipaty ýaqyt óte ózgerýi múmkin ekenin atap ótti.
