تالدىقورعاندا مارقۇم شەرزات بولاتتىڭ ولىمىنە قاتىستى ءىس بويىنشا سوت وتىرىسى جالعاسىپ جاتىر. كەزەكتى تىڭدالىمدا قايعىلى وقيعا بولعان ءتۇنى جاراقات العان نۇرقانات عايىپبايەۆتى تەكسەرگەن سوت-مەديسينالىق ساراپشى ومىربەك جولىمبەتوۆ كۋالىك بەردى، دەپ حابارلايدى Dalanews.kz.

ساراپتاما 2024 جىلدىڭ 9 قازانىندا جۇرگىزىلگەن. جولىمبەتوۆتىڭ ايتۋىنشا، عايىپبايەۆتىڭ دەنەسىندە ءتۇرلى دەنە جاراقاتتارى انىقتالعان. اتاپ ايتقاندا، سول جاق كوزىنىڭ استىندا 3 جانە 5 سم كولەمىندە كوگەرگەن قانتالاۋ، وڭ قۇلاق تۇسىندا – 2 جانە 1 سم شاماسىندا قانتالاۋ بولعان. سونداي-اق شۇيدە بولىگىندە جۇمساق تىندەردىڭ قابىنۋى تىركەلگەن. وڭ جامباسىندا 1،2 جانە 0،1 سم كولەمىندەگى جارا بولعان.

مەديسينالىق قورىتىندىدا عايىپبايەۆقا مىناداي دياگنوز قويىلعان:

• باس سۇيەك-ميىنىڭ جابىق جاراقاتى

• باس ميىنىڭ شايقالۋى

• ماڭداي جانە شۇيدە تۇسىنداعى جۇمساق تىندەردىڭ زاقىمدانۋى

• كەۋدە قۋىسىنىڭ جابىق جاراقاتى

• وڭ جامباستاعى بىرنەشە شانشىلا كەسىلگەن جارالار

• وڭ تىزە بۋىنى تىندەرىنىڭ سوعىلۋى

ساراپشىنىڭ ايتۋىنشا، عايىپبايەۆتىڭ جامباسىنا جاسالعان ءۇش شانشىلا كەسىلگەن جاراقات ءبىر قۇرالمەن، قىسقا ۋاقىت ارالىعىندا سالىنعان. بۇل جارالاردىڭ اراسى بىرنەشە سەكۋندتان اسپاعان.

الايدا ساراپتاما وقيعادان ءبىر اپتا وتكەن سوڭ جۇرگىزىلگەندىكتەن، جاراقاتتىڭ ناقتى تەرەڭدىگىن انىقتاۋ مۇمكىندىگى شەكتەۋلى بولعان. جولىمبەتوۆ جارالاردىڭ سيپاتى ۋاقىت وتە وزگەرۋى مۇمكىن ەكەنىن اتاپ ءوتتى.