Aıaýsyz óltirilgen jasóspirim Sherzat Bolattyń ákesi Qarjaýbaı Nurymov buqaralyq aqparat quraldarymen kezdesýdi talap etýde, dep habarlaıdy Dalanews.kz.
«Onyń bir ǵana talaby bar – quqyq qorǵaý organdary uly men baýyrynyń ólimine qatysty jaǵdaıdy adal tergese boldy», – dedi KazTAG redaksıasyna qoǵam qaıratkeri Dinmuhamed Qamataı.
Qoǵam belsendileriniń aıtýynsha, Nurymov qazir júk kóliginiń tóbesine shyǵyp, jýrnalısermen kezdesýdi kútip tur. Onyń aıtýynsha, oqıǵa ornynda Almaty oblysy Eńbekshiqazaq aýdanyna qarasty Azat aýylynda, kóptegen kúshtik qurylym ókilderi, sondaı-aq marqum jasóspirim men onyń aǵasynyń týystary, sonymen qatar basqa da azamattar jınalǵan.
Eske salaıyq, 9 jeltoqsanda Almaty oblysynda Sherzat Bolattyń aǵasy Nurqanat Ǵaıypbaev óli tabylǵan edi. Polısıa departamentiniń aldyn ala derekteri boıynsha, ol sýısıd jasaǵan. Oǵan dálel retinde polıseıler Nurqanattyń týysyna messendjer arqyly jazǵan hatyn jarıa etti.
Habarlamada ol týysqandarymen qoshtasyp, jıeniniń janyna jerleýdi suraǵan.
Bul fakti boıynsha qylmystyq is qozǵaldy. Qazirgi ýaqytta barlyq jaǵdaılardy anyqtaý úshin tergeý amaldary júrgizilip jatyr.
Sherzat Bolat tarapynyń advokaty Saıda Táýekelova jasóspirimniń aǵasynyń óli tabylýyna qatysty málimdeme jasaǵan bolatyn.
Saıda Táýekelova marqumnyń aǵasy Nurqanat Ǵaıypbaev kóz jumǵanyn rastady. "Chemodan gossekretov" telegram-arnasynda “Sherzat Bolattyń aǵasy tóbeles kezinde qarýdy birinshi alyp shyqqan, sol úshin ózin aıypty sezinip, óz-ózine qol salǵan” degen aqparat taraǵan.
"Marqumnyń tergeý barysynda bergen jaýaptarynan onyń qatty qobaljyǵanyn, inisiniń ólimine ózin kináli dep sanaǵanyn baıqaýǵa bolady. Sýısıd jasaýynyń da sebebi sol bolýy múmkin", delingen telegramdaǵy jazbada.
Advokat Táýekelova bul nusqany joqqa shyǵarǵan edi.
Al buǵan deıin Sherzat Bolat tarapynyń qorǵaýshysy Maral Jaılaýbaeva qandy oqıǵa bolǵan túni kúdiktiler marqum Sherzattyń aǵasy Nurqanatty da óltirýge oqtalǵanyn aıtqan edi.
“Biz Nurqanatty óltirýge oqtalý faktisi boıynsha tergeý organdaryna ótinish jiberdik. Kúdiktiler Nurqanatqa dene jaraqattaryn keltirip, 3-4 márte jambasy men tósine pyshaq suqqan. Atalǵan áreketter adamdy ómirinen aıyrýǵa tikeleı baǵyttalǵan, ıaǵnı naqty nıetpen jasalǵan dep esepteımiz. Bul ótinish qazir tergeý organdarymen qaralýda. Qylmystyq is boıynsha jábirlenýshiler men kúdiktilerdiń ortasynda bettestirý ótkizilip, qazirgi tańda taǵaıyndalǵan saraptamalardyń qorytyndylarymen biz tanysýdamyz”, - degen edi advokat.
