اياۋسىز ولتىرىلگەن ءجاسوسپىرىم شەرزات بولاتتىڭ اكەسى قارجاۋباي نۇرىموۆ بۇقارالىق اقپارات قۇرالدارىمەن كەزدەسۋدى تالاپ ەتۋدە، دەپ حابارلايدى Dalanews.kz.

«ونىڭ ءبىر عانا تالابى بار – قۇقىق قورعاۋ ورگاندارى ۇلى مەن باۋىرىنىڭ ولىمىنە قاتىستى جاعدايدى ادال تەرگەسە بولدى»، – دەدى  KazTAG رەداكسياسىنا قوعام قايراتكەرى دىنمۇحامەد قاماتاي.

قوعام بەلسەندىلەرىنىڭ ايتۋىنشا، نۇرىموۆ ءقازىر جۇك كولىگىنىڭ توبەسىنە شىعىپ، جۋرناليستەرمەن كەزدەسۋدى كۇتىپ تۇر. ونىڭ ايتۋىنشا، وقيعا ورنىندا الماتى وبلىسى ەڭبەكشىقازاق اۋدانىنا قاراستى ازات اۋىلىندا، كوپتەگەن كۇشتىك قۇرىلىم وكىلدەرى، سونداي-اق مارقۇم ءجاسوسپىرىم مەن ونىڭ اعاسىنىڭ تۋىستارى، سونىمەن قاتار باسقا دا ازاماتتار جينالعان.

ەسكە سالايىق، 9 جەلتوقساندا الماتى وبلىسىندا شەرزات بولاتتىڭ اعاسى نۇرقانات عايىپبايەۆ ءولى تابىلعان ەدى. پوليسيا دەپارتامەنتىنىڭ الدىن الا دەرەكتەرى بويىنشا، ول سۋيسيد جاساعان. وعان دالەل رەتىندە پوليسەيلەر نۇرقاناتتىڭ تۋىسىنا مەسسەندجەر ارقىلى جازعان حاتىن جاريا ەتتى. 

حابارلامادا ول تۋىسقاندارىمەن قوشتاسىپ، جيەنىنىڭ جانىنا جەرلەۋدى سۇراعان.

بۇل فاكتى بويىنشا قىلمىستىق ءىس قوزعالدى. قازىرگى ۋاقىتتا بارلىق جاعدايلاردى انىقتاۋ ءۇشىن تەرگەۋ امالدارى جۇرگىزىلىپ جاتىر. 

شەرزات بولات تاراپىنىڭ ادۆوكاتى سايدا تاۋەكەلوۆا ءجاسوسپىرىمنىڭ اعاسىنىڭ ءولى تابىلۋىنا قاتىستى مالىمدەمە جاساعان بولاتىن. 

سايدا تاۋەكەلوۆا مارقۇمنىڭ اعاسى نۇرقانات عايىپبايەۆ كوز جۇمعانىن راستادى. "چەمودان گوسسەكرەتوۆ" تەلەگرام-ارناسىندا “شەرزات بولاتتىڭ اعاسى توبەلەس كەزىندە قارۋدى ءبىرىنشى الىپ شىققان، سول ءۇشىن ءوزىن ايىپتى سەزىنىپ، وز-وزىنە قول سالعان” دەگەن اقپارات تاراعان.

"مارقۇمنىڭ تەرگەۋ بارىسىندا بەرگەن جاۋاپتارىنان ونىڭ قاتتى قوبالجىعانىن، ءىنىسىنىڭ ولىمىنە ءوزىن كىنالى دەپ ساناعانىن بايقاۋعا بولادى. سۋيسيد جاساۋىنىڭ دا سەبەبى سول بولۋى مۇمكىن"، دەلىنگەن تەلەگرامداعى جازبادا. 

ادۆوكات تاۋەكەلوۆا بۇل نۇسقانى جوققا شىعارعان ەدى. 

ال بۇعان دەيىن شەرزات بولات تاراپىنىڭ قورعاۋشىسى مارال جايلاۋبايەۆا قاندى وقيعا بولعان ءتۇنى كۇدىكتىلەر مارقۇم شەرزاتتىڭ اعاسى نۇرقاناتتى دا ولتىرۋگە وقتالعانىن ايتقان ەدى. 

“ءبىز نۇرقاناتتى ولتىرۋگە وقتالۋ فاكتىسى بويىنشا تەرگەۋ ورگاندارىنا ءوتىنىش جىبەردىك. كۇدىكتىلەر نۇرقاناتقا دەنە جاراقاتتارىن كەلتىرىپ، 3-4 مارتە جامباسى مەن توسىنە پىشاق سۇققان. اتالعان ارەكەتتەر ادامدى ومىرىنەن ايىرۋعا تىكەلەي باعىتتالعان، ياعني ناقتى نيەتپەن جاسالعان دەپ ەسەپتەيمىز. بۇل ءوتىنىش ءقازىر تەرگەۋ ورگاندارىمەن قارالۋدا. قىلمىستىق ءىس بويىنشا جابىرلەنۋشىلەر مەن كۇدىكتىلەردىڭ ورتاسىندا بەتتەستىرۋ وتكىزىلىپ، قازىرگى تاڭدا تاعايىندالعان ساراپتامالاردىڭ قورىتىندىلارىمەن ءبىز تانىسۋدامىز”، - دەگەن ەدى ادۆوكات.