Túrkistan oblysy ákiminiń orynbasary Nurbol Turashbekovtyń shardaralyq sharýalarmen kezdesýi barysynda aǵyn sý máselesi kóterilip, shaǵymdary zerdelendi.  Aýyl sharýashylyǵy basqarmasynyń basshysy Nurbek Badyraqov aýdandaǵy jaǵdaıdy baıandap, iske asyrylyp jatqan jobalardyń esebin usyndy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Qazirgi tańda Shardara aýdanynda 6 aýyl okrýgte sý arnalary mehanıkalyq tazalaýdan ótýde. Jalpy 1306 shaqyrym qashyrtqyny tazalaý kózdelgen, oryndalǵany – 1137 shaqyrym.

Jumys atqarýshy “Turan-Sý” MKK-niń basshysy Doshan Lesov joba boıynsha bekitilgen qashyrtqy 959 shaqyrymdy quraıtynyn, sharýalardyń ótinishimen jobadan tys 347 shaqyrymy qosymsha tazalanǵanyn baıandady. 

Atqarylǵan jumystyń nátıjesinde aýdanda 26 myń gektardan astam alqaptyń melıoratıvtik jaǵdaıy men aǵyn sýmen qamtylýy jaqsarady dep kútilýde.

Q.Turysbekov, Qosseıit, Kóksý, Uzyn-ata, Aqshengeldi, Dostyq aýyl okrýgterindegi jumystardyń barysyn baqylaǵan oblys ákiminiń orynbasary sýarmaly jer kólemin arttyrýǵa baǵyttalǵan jobalarmen de tanysty.

– Aǵyn sý tutynýda sharýalardyń talap-tilegi zań aıasynda saralanyp, júıelenýi tıis. Ásirese, sý aqysynyń tólemine qatysty eshqandaı suraq týyndamaýy qajet. Oblys ákiminiń tapsyrmasyna sáıkes, sharýashylyqtardyń ózekti máseleleri men yqtımal táýekelderine turaqty túrde monıtorıń júrgizemiz. Sharýalarmen ótken basqosýda aıtylǵan máselelerdi nazarǵa alyp, taldaý júrgizýdi tapsyramyn. Túıtkildi máseleniń túıinin tarqatýda biz eń aldymen onyń zańdylyǵyn qamtamasyz etýge mindettimiz, – dedi Nurbol Turashbekov.

Sonymen qatar Shardara aýdanynda 4 kanal kúrdeli jóndeýden ótýde. Qazirgi tańda 53,5 shaqyrymnyń 31,2 shaqyrymynda jumys aıaqtaldy. Nátıjesinde, 3616 gektarǵa sý jetkizý jaqsaryp, qosymsha 600 gektar jer aınalymǵa qosylady dep kútilýde.