تۇركىستان وبلىسى اكىمىنىڭ ورىنباسارى نۇربول تۇراشبەكوۆتىڭ شاردارالىق شارۋالارمەن كەزدەسۋى بارىسىندا اعىن سۋ ماسەلەسى كوتەرىلىپ، شاعىمدارى زەردەلەندى. اۋىل شارۋاشىلىعى باسقارماسىنىڭ باسشىسى نۇربەك بادىراقوۆ اۋدانداعى جاعدايدى بايانداپ، ىسكە اسىرىلىپ جاتقان جوبالاردىڭ ەسەبىن ۇسىندى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
قازىرگى تاڭدا شاردارا اۋدانىندا 6 اۋىل وكرۋگتە سۋ ارنالارى مەحانيكالىق تازالاۋدان وتۋدە. جالپى 1306 شاقىرىم قاشىرتقىنى تازالاۋ كوزدەلگەن، ورىندالعانى – 1137 شاقىرىم.
جۇمىس اتقارۋشى “تۇران-سۋ” مكك-نىڭ باسشىسى دوسحان لەسوۆ جوبا بويىنشا بەكىتىلگەن قاشىرتقى 959 شاقىرىمدى قۇرايتىنىن، شارۋالاردىڭ وتىنىشىمەن جوبادان تىس 347 شاقىرىمى قوسىمشا تازالانعانىن باياندادى.
اتقارىلعان جۇمىستىڭ ناتيجەسىندە اۋداندا 26 مىڭ گەكتاردان استام القاپتىڭ مەليوراتيۆتىك جاعدايى مەن اعىن سۋمەن قامتىلۋى جاقسارادى دەپ كۇتىلۋدە.
ق.تۇرىسبەكوۆ، قوسسەيىت، كوكسۋ، ۇزىن-اتا، اقشەنگەلدى، دوستىق اۋىل وكرۋگتەرىندەگى جۇمىستاردىڭ بارىسىن باقىلاعان وبلىس اكىمىنىڭ ورىنباسارى سۋارمالى جەر كولەمىن ارتتىرۋعا باعىتتالعان جوبالارمەن دە تانىستى.
– اعىن سۋ تۇتىنۋدا شارۋالاردىڭ تالاپ-تىلەگى زاڭ اياسىندا سارالانىپ، جۇيەلەنۋى ءتيىس. اسىرەسە، سۋ اقىسىنىڭ تولەمىنە قاتىستى ەشقانداي سۇراق تۋىنداماۋى قاجەت. وبلىس اكىمىنىڭ تاپسىرماسىنا سايكەس، شارۋاشىلىقتاردىڭ وزەكتى ماسەلەلەرى مەن ىقتيمال تاۋەكەلدەرىنە تۇراقتى تۇردە مونيتورينگ جۇرگىزەمىز. شارۋالارمەن وتكەن باسقوسۋدا ايتىلعان ماسەلەلەردى نازارعا الىپ، تالداۋ جۇرگىزۋدى تاپسىرامىن. تۇيتكىلدى ماسەلەنىڭ ءتۇيىنىن تارقاتۋدا ءبىز ەڭ الدىمەن ونىڭ زاڭدىلىعىن قامتاماسىز ەتۋگە مىندەتتىمىز، – دەدى نۇربول تۇراشبەكوۆ.
سونىمەن قاتار شاردارا اۋدانىندا 4 كانال كۇردەلى جوندەۋدەن وتۋدە. قازىرگى تاڭدا 53،5 شاقىرىمنىڭ 31،2 شاقىرىمىندا جۇمىس اياقتالدى. ناتيجەسىندە، 3616 گەكتارعا سۋ جەتكىزۋ جاقسارىپ، قوسىمشا 600 گەكتار جەر اينالىمعا قوسىلادى دەپ كۇتىلۋدە.
