اتىراۋداعى قاندى وقيعاعا قاتىستى كٷدٸككە ٸلٸنگەن سۇلتان مەن اقبايان تۋرالى ولاردىڭ بۇرىنعى كٶرشٸلەرٸ پٸكٸر بٸلدٸردٸ, دەپ dalanews.kz تٸلشٸسٸ kznews.kz سايتىنا سٸلتەمە جاساپ حابارلايدى.
كتك تەلەارناسىنىڭ اتىراۋ وبلىسىنداعى تٸلشٸسٸ جانات مولداشەۆاعا وسى ٷيدە بۇرىن تۇرعان تۇرعىنداردىڭ بٸرٸ حابارلاسقان. ونىڭ ايتۋىنشا, 2023 جىلى ولار اتالعان ٷيدٸڭ بٸر بٶلٸگٸن جالعا الىپ تۇرعان كەزدە سۇلتان مەن اقبايانمەن كٶرشٸ بولعان.
بۇرىنعى كٶرشٸسٸنٸڭ سٶزٸنشە, ەرلٸ-زايىپتى سىرت كٶزگە ٶتە تىنىش, جۋاس ەرٸ قاراپايىم وتباسى بولىپ كٶرٸنگەن. ولار كٶپشٸلٸكپەن ارتىق ارالاسپايتىن, ەشكٸممەن جانجالداسىپ, كٶزگە تٷسپەيتٸن ادامدار رەتٸندە ەستە قالعان. سوندىقتان كەيٸن بولعان جاعداي تۋرالى ەستٸگەندە كٶرشٸلەرٸ قاتتى تاڭعالعان.
كٶرشٸسٸ: – سالاماتسىز با! بٸز 2023 جىلى سول ٷيدٸڭ ەكٸنشٸ جاعىن جالداپ تۇردىق. سۇلتان مەن اقبايان بٸزدٸڭ كٶرشٸمٸز بولدى. ولار كٶشٸپ كەلگەننەن كەيٸن ەكٸ اي ٶتكەن سوڭ, بٸز باسقا جاققا كەتٸپ قالدىق. قازٸرگٸ جاڭالىقتاردى كٶرٸپ, قاتتى قورقىپ وتىرمىز. بٸزدٸ بٸر اللا ساقتاپ, ۋاقىتىندا كٶشٸپ كەتكەن ەكەنبٸز. ولار بٸزگە ٶتە جۋاس وتباسى بولىپ كٶرٸنگەن ەدٸ. سۇلتاننىڭ ناۋرىز ەسٸمدٸ اعاسى دا كەلٸپ تۇراتىن, ونى دا كٶرٸپ جٷردٸك.
سۇراق: – قايىرلى كەش! جاقىن ارالاستىڭىزدار ما?
كٶرشٸسٸ: – يە, جاقسى ارالاستىق. جۇما كٷندەرٸ باۋىرساق, پيروجكي پٸسٸرٸپ, بٸزگە ەكەلٸپ بەرەتٸن. بٸزدەن ستول الىپ تۇراتىن. توڭازىتقىشتارى بولماي, بٸزدٸڭ ٷيگە ەتتەرٸن سالىپ جٷردٸ. اقباياننىڭ مٸنەز-قۇلقىنان ەشقانداي وعاشتىق بايقالمادى, ٶتە تازا, ٷيٸن جيناپ, اقتاپ جٷرەتٸن ەدٸ.
سۇراق: – مارقۇمدار اتا-اناسىمەن ارالاسىپ تۇردى ما?
كٶرشٸسٸ: – يە, اقباياننىڭ اناسى كەلٸپ, بالالارىن قاراسىپ جٷرەتٸن. ونى دا, اعاسى ناۋرىزدى دا جيٸ كٶرەتٸنبٸز.
سۇراق: – سۇلتاننىڭ مٸنەزٸ قانداي ەدٸ? جولداسىڭىز ونىمەن جاقىن ارالاستى ما?
كٶرشٸسٸ: – سۇلتان دا ٶتە جۋاس بالا بولاتىن. تٸپتٸ جولداسىم تٷنگٸ اۋىسىمدا جۇمىس ٸستەگەندە: «ەكٸ كٸشكەنتاي ۇلىم مەن قىزىم ٷيدە جالعىز قالادى, سۇلتان, قاراپ قويشى», – دەپ وعان سەنٸپ تاپسىرىپ كەتەتٸن. ول كەزدە ٷي جالداۋ باعاسى قولجەتٸمدٸ بولعان سوڭ تۇردىق. كەيٸن جولدارى باتپاق بولعاسىن, 2023 جىلدىڭ جازىندا كٶشٸپ كەتكەن ەدٸك. قازٸر ويلاپ وتىرساق, «ٷندەمەيتٸن جۋاس ادامنان قورقۋ كەرەك» دەگەن راس ەكەن. ادامنان قورقاتىن زامان بولدى عوي.
