Atyraýdaǵy qandy oqiǵaǵa qatysty kúdikke ilingen Sultan men Aqbaian týraly olardyń burynǵy kórshileri pikir bildirdi, dep dalanews.kz tilshisi kznews.kz saityna silteme jasap habarlaidy.
KTK telearnasynyń Atyraý oblysyndaǵy tilshisi Janat Moldashevaǵa osy úide buryn turǵan turǵyndardyń biri habarlasqan. Onyń aitýynsha, 2023 jyly olar atalǵan úidiń bir bóligin jalǵa alyp turǵan kezde Sultan men Aqbaianmen kórshi bolǵan.
Burynǵy kórshisiniń sózinshe, erli-zaiypty syrt kózge óte tynysh, jýas ári qarapaiym otbasy bolyp kóringen. Olar kópshilikpen artyq aralaspaityn, eshkimmen janjaldasyp, kózge túspeitin adamdar retinde este qalǵan. Sondyqtan keiin bolǵan jaǵdai týraly estigende kórshileri qatty tańǵalǵan.
Kórshisi: – Salamatsyz ba! Biz 2023 jyly sol úidiń ekinshi jaǵyn jaldap turdyq. Sultan men Aqbaian bizdiń kórshimiz boldy. Olar kóship kelgennen keiin eki ai ótken soń, biz basqa jaqqa ketip qaldyq. Qazirgi jańalyqtardy kórip, qatty qorqyp otyrmyz. Bizdi bir Alla saqtap, ýaqytynda kóship ketken ekenbiz. Olar bizge óte jýas otbasy bolyp kóringen edi. Sultannyń Naýryz esimdi aǵasy da kelip turatyn, ony da kórip júrdik.
Suraq: – Qaiyrly kesh! Jaqyn aralastyńyzdar ma?
Kórshisi: – Iá, jaqsy aralastyq. Juma kúnderi baýyrsaq, pirojki pisirip, bizge ákelip beretin. Bizden stol alyp turatyn. Tońazytqyshtary bolmai, bizdiń úige etterin salyp júrdi. Aqbaiannyń minez-qulqynan eshqandai oǵashtyq baiqalmady, óte taza, úiin jinap, aqtap júretin edi.
Suraq: – Marqumdar ata-anasymen aralasyp turdy ma?
Kórshisi: – Iá, Aqbaiannyń anasy kelip, balalaryn qarasyp júretin. Ony da, aǵasy Naýryzdy da jii kóretinbiz.
Suraq: – Sultannyń minezi qandai edi? Joldasyńyz onymen jaqyn aralasty ma?
Kórshisi: – Sultan da óte jýas bala bolatyn. Tipti joldasym túngi aýysymda jumys istegende: «Eki kishkentai ulym men qyzym úide jalǵyz qalady, Sultan, qarap qoishy», – dep oǵan senip tapsyryp ketetin. Ol kezde úi jaldaý baǵasy qoljetimdi bolǵan soń turdyq. Keiin joldary batpaq bolǵasyn, 2023 jyldyń jazynda kóship ketken edik. Qazir oilap otyrsaq, «úndemeitin jýas adamnan qorqý kerek» degen ras eken. Adamnan qorqatyn zaman boldy ǵoi.
