Almatydaǵy «Radio úii» ǵimaratynda «Shalqar» radiosynyń tolyq jóndeýden ótken jańa stýdiiasy saltanatty túrde ashyldy. Jańa stýdiiaǵa qazaqtyń tuńǵysh radiodiktory, Qazaq radiosynyń ardageri, KSRO-nyń qurmetti radisi, Qazaq KSR-niń eńbek sińirgen mádeniet qairatkeri Mina Seiitovanyń esimi berildi, dep habarlaidy Dala News.
Saltanatty sharaǵa radio salasynyń ardagerleri, qazirgi qyzmetkerleri jáne buqaralyq aqparat quraldarynyń ókilderi qatysty. Stýdiianyń tusaýkeser rásiminde Rýslana Qudaibergenova, Saýyq Jaqanova, Altyn Imanbaeva syndy radionyń birqatar aǵa býyn ókilderi sóz sóilep, bul bastamanyń mańyzdylyǵyn atap ótti.
Jańa stýdiia «Shalqar» radiosynyń 60 jyldyq mereitoiy aiasynda, talai diktorǵa tálim bergen ustaz, radio óneriniń kórnekti ókili Mina Seiitovanyń jarqyn esimin ulyqtaý maqsatynda ashyldy.
Búginnen bastap jańa stýdiiadan «Shalqar» radiosynyń tikelei efirdegi onnan astam baǵdarlamasy tyńdarmanǵa jol tartady. Zamanaýi úlgide jabdyqtalǵan stýdiia qabyrǵasyna Mina Seiitovanyń portreti ornalastyrylyp, intererde Astana men Almaty qalalarynyń kórikti jerleri beinelengen.
Mina Seiitova 1919 jyly 20 tamyzda Qostanai oblysy Qarabalyq aýdanynyń №9 aýylynda dúniege kelgen. Ol 1934 jyly nebári 15 jasynda Qazaq radiosyna qyzmetke qabyldandy.
Ekinshi dúniejúzilik soǵys jyldary Máskeýden taraǵan resmi aqparattardy KSRO halyqtaryna Iýrii Levitan jetkizse, qazaq dalasyna soǵys habarlaryn Mina Seiitovanyń úni jetkizdi.
Ol mikrofon aldynda 44 jyl qyzmet etip, radio salasynda birneshe býyn diktor men mádeniet qairatkerlerin tárbieledi. Onyń shákirtteriniń qatarynda Qazaq KSR-iniń halyq ártisi Ánýarbek Baijanbaev, KSRO halyq ártisi Ermek Serkebaev, Qazaq KSR-iniń halyq ártisi Zámzagúl Sháripova, aqyn Muqaǵali Maqataev, KSRO halyq ártisi Bibigúl Tólegenova, diktorlar Mambet Serjanov, Gennadii Mariýhin, Qazaqstannyń eńbek sińirgen qairatkeri Saýyq Jaqanova jáne basqa da tanymal tulǵalar bar.
Qazaqtyń tuńǵysh diktory Mina Seiitova eńbek jolynda birneshe joǵary memlekettik nagradalarmen marapattalǵan. 1978 jyly qurmetti demalysqa shyǵyp, 1987 jyly dúnieden ótti.
