Sankt-Peterbýrgtegi «Shok» radiostantsiiasynda tikelei efir kezinde tótenshe oqiǵa boldy. Qazaqstannan kelgen er adam stýdiiaǵa basa-kóktep kirip, mikrofondy talap etken. Oqiǵa 2 jeltoqsanda bolǵan. «Fontanka» basylymynyń málimetinshe, endi onyń aitqandaryn Reseidiń FSB qyzmetkerleri tekserip jatyr, dep habarlaidy Dalanews.kz.
Oqiǵa jeksenbi keshkisin, radiodaǵy efir barysynda, stýdiiada qonaq bolyp otyrǵan baspager Gleb Stafeevtiń kóz aldynda bolǵan. Efirde ádebietke qatysty áńgime júrip jatqan kezde stýdiia esigi qaǵylady.
«Efir bastalǵanyna 15 minýttai bolǵanda, esik qaǵyldy. Sol sátte mýzykalyq úzilis edi. Radiojúrgizýshi esikti ashty. Kenet bireý soqqy jasap, júrgizýshi qabyrǵaǵa ushyp tústi. Ol ózi aryq, álsizdeý jigit qoi, ábden abdyrap qaldy. Al shabýyl jasaǵan adam tikelei efir kerek ekenin, áitpese jarylys bolatynyn aitty», - dedi Stafeev «Fontanka» tilshisine.
Onyń aitýynsha, stýdiiaǵa kirgen er adam júrgizýshiniń ornyna otyryp, mikrofondy qosýdyń amalyn jasai bastaǵan. Stafeev ony sabyr saqtaýyn surap, dialog ornatýǵa tyrysqan.
«Onymen sóilese bastadym. Radiojúrgizýshi politsiiaǵa habarlaýǵa júgirip ketti. Biz onyń qoqan-loqy jasap turǵanyn qaidan bileiik? Tikelei efirden basqa naqty talap aitpady. Mikrofondy alǵan soń arnaiy áskeri operatsiiaǵa qarsy sóilep, Máskeý men atom bombalary týraly aitty», - dedi ol.
Beitanys er adam ózin Nurlan dep tanystyryp, Qazaqstannan kelgenin aitqan. 52 jastaǵy qazaqstandyq biyl qazan aiynda «Piter FM» radiostantsiiasyna da basa-kóktep kirip, basqa keńselerge de kirýge talpynypty. Ol kezde politsiia ony alyp ketkenimen, kóp uzamai qaita bosap shyqqan. Endi ol bul áreketin taǵy qaitalap otyr.
Stafeev onyń bul jolǵy áreketi áldeqaida qaýipti ekenin atap ótti, sebebi bul joly ol efirge shyǵyp, saiasi málimdemeler jasaǵan.
Jaǵdai ýshyǵa bastaǵan kezde stýdiiaǵa politsiia kelip jetken.
«Politseiler kelgende biz onymen áli sóilesip otyrdyq. Keiin ol stýdiiadan shyǵyp, esh qarsylyqsyz berildi. Qol jumsaý nemese kúsh qoldaný bolǵan joq», - dep qorytyndylady Gleb Stafeev.
Er adamnyń efir kezinde aitqandary qazir arnaiy qyzmettiń nazarynda. Oqiǵanyń mán-jaiy tolyq anyqtalǵansha, quqyq qorǵaý organdary qosymsha tergeý júrgizip jatyr.
