Qazaqstan aldaǵy 5-10 jyl ishinde muhittyń arǵy jaǵyna kedergisiz jetýdi josparlap otyr. Onda da muny temir joldyń kómegimen júzege asyrmaq. Mundai batyl josparlar jaily el vitse-premeri Serik Jumanǵarin KGF-2025 forýmynda aitty, dep habarlaidy Dalanews.kz LS basylymyna silteme jasap.
Ol Qazaqstannyń Túrkimenstan arqyly ótetin osyndai marshrýty bar ekenin, biraq Irannyń temirjol infraqurylymynyń múshkil kúii men sanktsiialar oǵan kedergi keltirip otyrǵanyn basa atap ótti.
Sondyqtan Serik Jumanǵarin Qazaqstannyń Aýǵanstan arqyly Pákistannyń teńiz porttaryna salynatyn jolǵa bás tigip otyrǵanyn jetkizdi.
Shendi muhitqa jol bolmaiynsha, kólik jáne mýltimodaldyq logistikanyń shekteýliligine bailanysty eldiń tranzittik damýynyń kez-kelgen josparyna kúmán keltirýge bolady dep sanaidy.
Aita ketsek, 2025 jyly 11 shildede Qazaqstannyń Aýǵanstandaǵy temir jol qurylysyna jarty milliard dollar investitsiia quiǵany belgili boldy.
Birinshi kezeńde Túrkimenstan men Aýǵanstan – Týrýgýndi arasyndaǵy shekara stantsiiasynan Aýǵanstannyń Gerat qalasyna deiin temirjol jelisi salynady.
"Ári qarai joldy Geratqa deiin aparatyn qurylys kompaniiasyna kóbirek steikholderler tartylady. Biz olarǵa jańa qarjylandyrý kózderi bolýy úshin Taiaý Shyǵystaǵy seriktester qosylǵanyn qalaimyz. EAEO boiynsha seriktesterdi de tartamyz, óitkeni bul ońtústikke aparatyn birden bir eń qysqa jol", – deidi Jumanǵarin.
Vitse-premer Gerattan eki baǵytqa taǵy qatynaýǵa bolatyndyǵyna nazar aýdardy. Onyń ishinde Pákistan arqyly Karachi portyna deiin (shamamen 500 km), sondai-aq jańadan qurylǵan Chabahar portyna (Iran) da barýǵa bolady. Sheneýnik bul jobany Qazaqstan úshin óte tiimdi ekenin aitady, óitkeni bul - teńizderge jetkizetin eń jyldam baǵyt.
"Bizge teńizderge, porttarǵa aparatyn jol kerek. Bul óte mańyzdy. Biz onsyz tunshyǵyp jatyrmyz. Ári qarai damý týraly aitý qiyn. Sondyqtan biz buǵan erte me, kesh pe kelemiz, meniń oiymsha, biz maqsatymyzǵa jaqyn bolashaqta jetemiz", - dep sendiredi Jumanǵarin.
Buǵan deiin Memleket basshysynyń Niý-Iork qalasyna resmi sapary aiasynda AQSh Saýda ministri Govard Latniktiń qatysýymen amerikalyq Wabtec kompaniiasymen jalpy somasy 4,2 milliard dollarǵa jýyq kelisimge qol qoiý rásimi ótkeni belgili. Qujatta Qazaqstanda tehnikalyq turǵydan jetildirilgen 300 lokomotiv shyǵarý jáne oǵan servistik qyzmet kórsetý qarastyrylǵan.
