Prezident kezekti suhbatynda áleýmettik jelilerdi synǵa aldy. Alaida máseleniń túp-tórkini tereńde jatyr. Belgili jýrnalist ári mediamenedjer Erlan Bekhojin qazaqstandyq televiziianyń nege yqpalynan aiyrylǵanyn jáne kórermendi qalai qaita tartýǵa bolatynyn aitty, dep habarlaidy Dalanews.kz Exclusive.kz-ke silteme jasap.
Erlan Bekhojinniń pikirinshe, teledidar – iritki týdyratyn áleýmettik jelilerge qarsy tura alatyn eń pármendi qural.
"Alaida Qazaqstanda bul múmkindik tolyq iske aspai otyr. AQSh pen Reseide televiziia qoǵamdyq pikirdi qalyptastyratyn qýatty institýt retinde jumys istese, qazaqstandyq kórermen otandyq arnalardyń baqylaýda ekenin, ótkir ári ózekti máselelerdi ashyq kótere almaitynyn anyq sezedi. Nátijesinde aýditoriia saittar men áleýmettik jelilerge aýysyp, paida bolǵan aqparattyq vakýýmdy qaýeset, emotsiia, alyp-qashpa áńgimeler toltyrady. Al resmi televiziia jaýapty organdardan ruqsat kútip otyrǵanda, áleýmettik jeliler bilikke tiimsiz qoǵamdyq pikirdi qalyptastyryp úlgeredi", - deidi ol.
Mediamenedjerdiń aitýynsha, memlekettik televiziiada blogerlerde joq resýrstar jetkilikti. Kásibi redaktsiialar, tájiribeli jýrnalister, aimaqtyq tilshiler jelisi, tereń taldaý jasaýǵa múmkindik bar.
"AQSh pen Reseidiń iri telearnalary osy artyqshylyqty barynsha paidalanyp, qoǵamdyq diskýssiiaǵa jyldam ári tiimdi yqpal etip otyr", - dedi ol.
Sonymen qatar ol bir mańyzdy paradoksty atap ótti.
"Tótenshe jaǵdai kezinde halyq báribir memlekettik televiziiaǵa júginedi. Sebebi dál osy arnalar arqyly jaýapty tulǵalardan alynǵan rastalǵan aqparat taratylady. Alaida bul senim uzaqqa sozylmaidy. Qalypty ómirge oralǵan sátte kórermen televiziiadan qaita alshaqtaidy. Bul jaǵdai televiziiaǵa erkindik berý memleketti álsiretpeitinin, kerisinshe onyń áleýetin ashyp, básekege qabilettiligin arttyratynyn kórsetedi. Al ózin-ózi shekteý jalǵasa berse, aqparattyq keńistikte erkin sóileitinder ústemdik ala beredi", - dep qosty ol.
Erlan Bekhojin buǵan deiin "Habar" arnasynda ózi jetekshilik etken komanda óńirlik problemalardy kótergen "Ákimder" baǵdarlamasyn iske qosqanyn eske aldy.
"Bul joba qazaqstandyq kórermenniń ǵana emes, eldegi halyqaralyq uiym ókilderiniń de oń baǵasyn alǵan. Baǵdarlama barysynda jýrnalist Ashat Niiazovqa tikelei tyiym salynbaǵan, tek shekten tys haipqa umtylǵan sátterde redaktsiialyq deńgeide eskertý jasalyp otyrdy", - dedi ol.
Baǵdarlama Prezident Qasym-Jomart Toqaevtyń alǵashqy Joldaýyndaǵy "ákimder halyqpen ashyq dialog júrgizýi tiis" degen ustanymyna naqty jaýap boldy. "Ákimder" jobasy kóptegen sheneýnikti halyqpen betpe-bet kelip, suraqqa jaýap berýge májbúrledi. Tipti túrli deńgeidegi ákimder arasynda túsirilim toby kenetten kelgen jaǵdaida qandai suraq qoiylatynyn talqylaityn arnaiy chat ta bolǵan.
"Baǵdarlamanyń yqpaldy bolýynyń basty sebebi – memlekettik arnada aitylǵan árbir sóz úshin jeke jaýapkershiliktiń bolýy. Al áleýmettik jelilerde, kerisinshe, jaýapsyzdyq pen baqylaýsyzdyq beleń alǵan. "It úredi, kerýen kóshedi" qaǵidasy ústem", - dedi ol.
Erlan Bekhojinniń oiynsha, mundai ahýalǵa qarsy turýdyń eń tiimdi joly – sapaly, tereń mazmundy kino men kontent óndirý. Sebebi kino keń aýditoriiany qamtyp, qoǵamdyq sanany qalyptastyra alady. Alaida búgingi kórermen tómen deńgeidegi kommertsiialyq ónimge úirenip alǵan. Al qoǵamdy ádeii qarabaiyrlandyrý jalǵasa berse, mundai ortada saý ekonomika da, jasampaz kózqaras ta qalyptaspaidy. Ondai qoǵamda adamdar qurýdan góri qiratyp, kúiretýge beiim bolady.
Al "Ákimder" baǵdarlamasynyń jabylýyna qatysty ol jobanyń ózi "Habardan" ketkennen keiin, iaǵni 2022 jyly efirden alynǵanyn aitady. Buǵan deiin de jobaǵa qysym bolǵanymen, sol kezeńde Prezident ákimshiligin basqarǵan Erlan Qoshanov baǵdarlamanyń mańyzyn túsinip, qoldaý kórsetken. Alaida keiin bul qoldaý toqtap, joba efirden alyndy.
