Semeide shyrsha bezendiremin dep biikten qulap, aýyr jaraqat alǵan muǵalimniń áieli bilikten ótemaqy talap etti, dep habarlaidy Dalanews.kz.
Muǵalimniń jary Symbat Aianqyzy KTK telearnasyna naýqastyń áli jarty jyl em alýy qajet ekenin jetkizdi.
Onyń aitýynsha, 23 jastaǵy muǵalim Qýat Aitqali ózdiginen júrip-tura almaidy. Sondyqtan ony kútip, qaraý úshin de bir adam qasynda otyrýy qajet.
“Dárigerler onyń miyna quiylǵan qandy toqtatyp, synǵan bas súieginiń jartysyn alyp tastaǵan. Endi eki aidan keiin onyń ornyna plastmassa salý úshin qaita ota jasalady.
Jábirlenýshiniń áieli ustazdarǵa shahar basshysynyń orynbasary men bilim bóliminiń basshylary shyrshanyń basyna shyǵýǵa buiryq bergenin aitady. Semeidegi bas shyrshany bezendirýge barlyǵy on mekteptiń muǵalimderi jumyldyrylǵan eken”, — deidi KTK telearnasy.
Muǵalimniń áieli qaǵaz júzinde bolmasa da, buiryq aýyzsha berilgeni anyq dep otyr. Endi tergeý aiaqtalǵan soń advokat jaldap, ótemaqy talap etý úshin sotqa júginbek.
“Biz barlyǵyn zań júzinde istep jatyrmyz. Qazir 362-baptyń tórtinshi tarmaǵy boiynsha qylmystyq is qozǵaldy. Tergeý júrip jatyr. Barlyǵynan suraq alynyp jatyr. Endi aldaǵy ýaqytta sot ádil ótedi degen sheshimdemiz. Tergeý qalai bitedi, kimdi kináli qylady, biz solarǵa aryz jazyp, bárin sotpen sheshemiz”, – deidi Symbat Aianqyzy.
Aita keteiik, 9 qańtarda aýyr jaraqat alǵan semeilik muǵalim Qýat Aitqalievtyń aýrýhanadan shyqqany týraly jazǵan edik.
Oqý-aǵartý ministri Ǵani Beisembaevtyń aitýynsha, qazirgi ýaqytta muǵalimge ótemaqy tóleý máselesi qarastyrylyp jatyr.
Eske salaiyq, buǵan deiin Semeide jańa jyldyq shyrshany bezendirý kezinde muǵalim biikten qulap, aýyr jaraqat alǵan edi.
Oqý-aǵartý ministri Ǵani Beisembaev Facebook-tegi paraqshasynda atalǵan oqiǵaǵa bailanysty oblys basshylyǵy ádil ári jan-jaqty tekserý júrgizý kerek ekenin aitqan bolatyn.
"Semei qalasynda muǵalimderdi jańajyldyq shyrshany bezendirýge tartý jáne áriptesimizdiń osy is barysynda jaraqat alýy — zań buzýshylyqtyń aiqyn kórinisi. Pedagogterdi kásibi mindetterine jatpaityn mundai jumystarǵa tartý — «Pedagog mártebesi týraly» zańdy óreskel buzý dep sanaimyn. Bul oqiǵaǵa bailanysty oblys basshylyǵy ádil ári jan-jaqty tekserý júrgizip, aldaǵy ýaqytta mundai keleńsizdikterdiń qaitalanýyna jol bermeý úshin tiisti sharalar qabyldaidy dep úmittenemin", — dep jazdy ol.
