Búgin Semeide oblystyq sottyń jańa ǵimaraty paidalanýǵa berildi. Ashylý saltanatyna oblys ákimi Berik Ýáli, QR Joǵarǵy Sotynyń Ákimshilik ister alqasynyń tóraǵasy Aslan Týkiev, QR Sot ákimshiligi basshysynyń birinshi orynbasary Shákir Shaiahmetov, óńirdiń sot júiesiniń ardagerleri men qyzmetkerleri qatysty, - dep habarlaidy Dalanews.kz
Sottyń jańa ǵimaraty tórt qabatty. Jalpy aýmaǵy 7910 sharshy metrdi quraidy. Nysanda 9 sot zaly, 78 qyzmettik kabinet, mediator, advokat, prokýror, ombýdsmenge arnalǵan bólmeler bar. Zamanaýi front-ofis, baspasóz ortalyǵy, murajai, akt zaly, psihologiialyq kómek bólmesi kelýshilerge qolaily jaǵdai jasaýǵa baǵyttalǵan.
Sot otyrysy zaldary aýdio-beinejazba júiesimen, qaýipsizdik jáne beinebaqylaý tehnologiialarymen tolyq jaraqtalǵan. Jańa ǵimaratta 17 sýdia men 45 ákimshilik qyzmetker jumys isteitin bolady.
QR Joǵarǵy Sotynyń Ákimshilik ister alqasynyń tóraǵasy Aslan Týkiev jańa ǵimarat Memleket basshysynyń tapsyrmasymen salynǵanyn, bul sot tóreligin sapaly júzege asyrý jolyndaǵy mańyzdy qadam ekenin aitty.
Nysannyń ashylýynda quttyqtaý sóz sóilegen aimaq basshysy oblys qurylǵannan beri Semeide salynǵan alǵashqy eńseli, jańa ǵimarat ekenin atap ótti.
«Bul – tek jańa nysan ǵana emes, halyqtyń ádildikke, zańǵa jáne teńdikke degen seniminiń nyshany. Prezidentimiz Qasym-Jomart Kemeluly Toqaev sot júiesin jetildirýdi, onyń ádil ári qoljetimdi bolýyn árqashan basty nazarda ustap keledi. «Ádiletti Qazaqstan» ideiasynyń ózegi de – osy. Sondyqtan bul jańa ǵimarat azamattardyń quqyǵy qorǵalatyn, daýlary ádil sheshim tabatyn, zań ústemdik quratyn qasietti orynǵa ainalýy tiis. Abai oblystyq sotynyń ujymy bul ǵimaratta osy mindetti abyroimen atqarady dep senemiz. Zań men tártiptiń, ádildiktiń jolynda tabandylyqpen eńbek etip, elimizdiń sot júiesiniń damýyna súbeli úles qosaryna kúmán joq», - dedi oblys ákimi.
