Erteń Semeide ótetin «Týǵan jerge týyńdy tik» investitsiialyq forýmy qarsańynda qalanyń avtobýs parki jańa avtobýstarmen tolyqty,- dep habarlaidy Dalanews.kz
Qazirgi tańda qala aýmaǵynda 42 marshrýt jumys isteidi. Oǵan 331 avtobýs tartylǵan. Oblys ortalyǵynda 5 tasymaldaýshy jolaýshylarǵa qyzmet kórsetedi. Semeidiń avtobýs parki 2019 jyldan beri jańartylmaǵan, iaǵni, jańa avtobýstar alynbaǵan eken.
Búgin Semeide zamanaýi, jańa avtobýstar tanystyryldy. Oblys ákimdiginiń qoldaýymen «Avto Trans Semei» JShS Semeide jasalǵan 44 jańa avtobýsty satyp alyp, qalanyń kólik júiesin jańartýǵa úles qosty. Erekshe atap óterligi, jańa avtobýstardyń barlyǵy salqyndatý qurylǵylarymen jabdyqtalǵan.
Oblys ákimi Berik Ýáli jańa avtobýstardy kórip, qalaishilik jolaýshy tasymaldaý salasynda turǵyndardyń qolailylyǵyna baǵyttalǵan jumystardyń júieli túrde jalǵasatynyn atap ótti.
«Osydan bir ai buryn oblystyń damý josparyn tanystyrǵan kezde qalanyń avtobýs parkin jańartamyz dep ýáde bergenbiz. Mine, endi 44 avtobýsty qalaǵa jibergeli turmyz. Onyń 30-y úlken, 14-i shaǵyn avtobýstar. Barlyǵy ózimizdiń Semeide shyǵarylǵan. Sapaly, básekege qabiletti avtobýstar. Bul avtobýstarǵa basqa oblystar da qyzyǵýshylyq tanytyp, suranysqa ie bolyp otyr. Biraq avtobýs shyǵaratyn zaýyttyń basshylyǵy birinshi bolyp bizge osyndai múmkindik týǵyzyp otyr. Jyl sońyna deiin jańa avtobýstardyń sanyn 70-ke jetkizýdi kózdep otyrmyz. Kelesi jylǵa taǵy da 50 avtobýs alamyz degen josparymyz bar. Osylaisha kezeń-kezeńimen Semei qalasyndaǵy avtobýstardy jańartamyz. Endi qala turǵyndary salqyndatqyshy bar avtobýstarmen alǵash ret júretin bolady. Abaidyń 180 jyldyǵyna orai alynǵan avtobýstar uly aqynnyń logotipimen bezendirilgen. Bizdiń basty maqsatymyz – qala turǵyndary men qonaqtarynyń júrip-turýyna jaily jaǵdai týǵyzý. Osy baǵyttaǵy jumysty aldaǵy ýaqytta da jalǵastyramyz», - dedi aimaq basshysy.
