ەرتەڭ سەمەيدە وتەتىن «تۋعان جەرگە تۋىڭدى تىك» ينۆەستيسيالىق فورۋمى قارساڭىندا قالانىڭ اۆتوبۋس پاركى جاڭا اۆتوبۋستارمەن تولىقتى،- دەپ حابارلايدى Dalanews.kz
قازىرگى تاڭدا قالا اۋماعىندا 42 مارشرۋت جۇمىس ىستەيدى. وعان 331 اۆتوبۋس تارتىلعان. وبلىس ورتالىعىندا 5 تاسىمالداۋشى جولاۋشىلارعا قىزمەت كورسەتەدى. سەمەيدىڭ اۆتوبۋس پاركى 2019 جىلدان بەرى جاڭارتىلماعان، ياعني، جاڭا اۆتوبۋستار الىنباعان ەكەن.
بۇگىن سەمەيدە زاماناۋي، جاڭا اۆتوبۋستار تانىستىرىلدى. وبلىس اكىمدىگىنىڭ قولداۋىمەن «اۆتو ترانس سەمەي» ج ش س سەمەيدە جاسالعان 44 جاڭا اۆتوبۋستى ساتىپ الىپ، قالانىڭ كولىك جۇيەسىن جاڭارتۋعا ۇلەس قوستى. ەرەكشە اتاپ وتەرلىگى، جاڭا اۆتوبۋستاردىڭ بارلىعى سالقىنداتۋ قۇرىلعىلارىمەن جابدىقتالعان.
وبلىس اكىمى بەرىك ءۋالي جاڭا اۆتوبۋستاردى كورىپ، قالاىشىلىك جولاۋشى تاسىمالداۋ سالاسىندا تۇرعىنداردىڭ قولايلىلىعىنا باعىتتالعان جۇمىستاردىڭ جۇيەلى تۇردە جالعاساتىنىن اتاپ ءوتتى.
«وسىدان ءبىر اي بۇرىن وبلىستىڭ دامۋ جوسپارىن تانىستىرعان كەزدە قالانىڭ اۆتوبۋس پاركىن جاڭارتامىز دەپ ۋادە بەرگەنبىز. مىنە، ەندى 44 اۆتوبۋستى قالاعا جىبەرگەلى تۇرمىز. ونىڭ 30-ى ۇلكەن، 14ء-ى شاعىن اۆتوبۋستار. بارلىعى ءوزىمىزدىڭ سەمەيدە شىعارىلعان. ساپالى، باسەكەگە قابىلەتتى اۆتوبۋستار. بۇل اۆتوبۋستارعا باسقا وبلىستار دا قىزىعۋشىلىق تانىتىپ، سۇرانىسقا يە بولىپ وتىر. ءبىراق اۆتوبۋس شىعاراتىن زاۋىتتىڭ باسشىلىعى ءبىرىنشى بولىپ بىزگە وسىنداي مۇمكىندىك تۋعىزىپ وتىر. جىل سوڭىنا دەيىن جاڭا اۆتوبۋستاردىڭ سانىن 70-كە جەتكىزۋدى كوزدەپ وتىرمىز. كەلەسى جىلعا تاعى دا 50 اۆتوبۋس الامىز دەگەن جوسپارىمىز بار. وسىلايشا كەزەڭ-كەزەڭىمەن سەمەي قالاسىنداعى اۆتوبۋستاردى جاڭارتامىز. ەندى قالا تۇرعىندارى سالقىنداتقىشى بار اۆتوبۋستارمەن العاش رەت جۇرەتىن بولادى. ابايدىڭ 180 جىلدىعىنا وراي الىنعان اۆتوبۋستار ۇلى اقىننىڭ لوگوتيپىمەن بەزەندىرىلگەن. ءبىزدىڭ باستى ماقساتىمىز – قالا تۇرعىندارى مەن قوناقتارىنىڭ ءجۇرىپ-تۇرۋىنا جايلى جاعداي تۋعىزۋ. وسى باعىتتاعى جۇمىستى الداعى ۋاقىتتا دا جالعاستىرامىز»، - دەدى ايماق باسشىسى.
