Semeide qurylys kompaniiasy basshylaryna qatysty rezonansty is boiynsha úkim shyqty, dep habarlaidy dalanews.kz.
2026 jylǵy 12 maýsymda Semei qalasynyń qylmystyq ister jónindegi aýdanaralyq soty «Dala-SK» qurylys kompaniialary tobynyń jetekshilerine qatysty úkim shyǵardy.
Sotta J. men N. 2022 jylǵy qazannan 2024 jylǵy jeltoqsanǵa deiin Óskemen qalasynda úlestik qurylysqa qatysýshylardan zańsyz túrde 1,5 milliard teńgeden astam qarjy tartqany anyqtaldy.
Sot málimetinshe, dál osyndai shema Semeide de júzege asyrylǵan. Atap aitqanda, J. men R. 2023 jylǵy mamyrdan 2025 jylǵy naýryzǵa deiin úleskerlerden taǵy 1,5 milliard teńgeden astam qarajat jinaǵan.
Budan bólek, J. men R. salynyp jatqan «Irtysh Riverside» turǵyn úi kesheninen páter brondaý týraly kelisimderdi 13 azamatpen jasaǵan. Osy epizod boiynsha keltirilgen shyǵyn kólemi 193 million teńgeden asqan. Qazirgi ýaqytta bul shyǵyn tolyq ótelgen.
Sot talqylaýy barysynda aiyptalýshylardyń kinási jábirlenýshiler men kýálardyń jaýaptarymen, mamandardyń qorytyndylarymen jáne is materialdarymen dáleldengen.
Al sottalýshylar óz kinálaryn moiyndamai, ózderin aqtaýdy nemese bas bostandyǵynan aiyrýmen bailanysty emes jaza taǵaiyndaýdy suraǵan.
Nátijesinde sot J.-ny kináli dep tanyp, ony 6 jyl 8 ai merzimge bas bostandyǵynan aiyrý jazasyna kesti. Sondai-aq oǵan 10 jyl boiy qurylys salasynda qyzmetpen ainalysýǵa tyiym salyndy.
Qazaqstan Konstitýtsiiasynyń 30 jyldyǵyna orai jariialanǵan raqymshylyqqa bailanysty jaza merzimi 5 jyl 4 aiǵa deiin qysqartyldy.
M. Qazaqstan Respýblikasy Qylmystyq kodeksiniń 214-baby 2-bóligi 2-tarmaǵy jáne 190-baby 4-bóligi 2-tarmaǵy boiynsha 5 jylǵa bas bostandyǵynan aiyryldy. Oǵan da qurylys salasynda 10 jyl jumys isteýge tyiym salyndy. Raqymshylyqtan keiin onyń jaza merzimi 4 jylǵa qysqardy.
Al N. Óskemendegi epizod boiynsha Qylmystyq kodekstiń 214-baby 2-bóligi 2-tarmaǵy boiynsha kináli dep tanylyp, 2 jyl 6 ai merzimge probatsiialyq baqylaýmen bas bostandyǵyn shekteý jazasyn aldy.
Atalǵan epizod boiynsha materialdyq shyǵyn men azamattyq talaptardyń bolmaýyna bailanysty N. raqymshylyq aktisi negizinde qylmystyq jaýapkershilikten bosatyldy.
Sottyń baspasóz qyzmetiniń málimetinshe, jaza taǵaiyndaý kezinde jeńildetetin mán-jailar eskerilgen. Aýyrlatatyn mán-jailar anyqtalmaǵan.
Úkimder ázirge zańdy kúshine engen joq.
Sonymen qatar sot jábirlenýshilerdiń 11 talap-aryzyn qanaǵattandyryp, J. men R.-dan 149 million teńgeden astam qarajat óndirip berý týraly sheshim shyǵardy.
Jábirlenýshilerdiń talaptaryn oryndaýdy qamtamasyz etý maqsatynda múlikke salynǵan tyiymdar men ózge de shekteýler kúshinde qaldyryldy.
