Qazaqstandyq saiasattanýshy Ǵaziz Ábishev reseilik nasihatshy Vladimir Soloviovtiń daýly málimdemesine qatysty pikir bildirdi, dep habarlaidy Dalanews.kz.
Buǵan deiin reseilik telejúrgizýshi Ortalyq Aziia men Kavkazdy Reseidiń "yqpaldy aýmaǵy" retinde atap, qajet bolǵan jaǵdaida atalǵan óńirlerge qarsy halyqaralyq quqyqty elemei, áskeri kúsh qoldanýǵa bolatynyn ashyq túrde meńzegen edi.
"Bul málimdeme Kremldiń AQSh-tyń Venesýelaǵa qatysty áreketterine janama reaktsiiasy ma, álde Ortalyq Aziia men Kavkaz elderine baǵyttalǵan eskertý me, ne bolmasa Soloviovtiń jeke saiasi demarshy ma - aitý qiyn. Munyń bári qatar kelgen bolýy da múmkin", - dedi Ǵaziz Ábishev.
Onyń pikirinshe, mundai sebepsiz ári jariia sipattaǵy málimdemeler odaqtas elderge qatysty memleketaralyq qarym-qatynas ádebiniń buzylýy retinde baǵalanýy tiis.
"Bir nárseni naqty ajyrata bilý kerek. Óz elińniń geosaiasi múddelerin ashyq aitý - qalypty jaǵdai. Al kórshi memlekettermen yqtimal áskeri qaqtyǵysqa qoǵamdy aldyn ala daiyndaý múlde basqa másele", - dep atap ótti saiasattanýshy.
Sondai-aq Ábishev óshpendilikke negizdelgen mundai ritorikanyń naqty saldary bar ekenin eskertti. Onyń sózinshe, dál osyndai málimdemelerden keiin Qazaqstan sekildi elderdiń kópvektorly saiasat ustanyp, Qytai, Túrkiia jáne ózge memlekettermen, onyń ishinde áskeri yntymaqtastyqty damytýy keibir ortada teris qabyldana bastaidy.
"Sodan soń "olar bizge qarsy birdeńe oilastyryp jatyr ma, nege basqa eldermen jaqyndasady, nege qarý alady, nege birlesken jattyǵýlar ótkizedi" degen orynsyz kúdik týyndaidy. Al mundai kózqarastyń qaidan shyqqanyna mán berilmei jatady", — dedi ol.
Sovolevtiń málimdemesi
Eske salaiyq, buǵan deiin reseilik nasihatshy Vladimir Soloviov Máskeý "arnaiy áskeri operatsiiany" tek Ýkrainada emes, postkeńestik keńistiktegi ózge elderde de bastaýy múmkin ekenin málimdegen edi.
Onyń aitýynsha, Resei úshin eń qaýipti aimaqtar - Armeniia men Ortalyq Aziia memleketteri. Soloviov bul baǵyttar ulttyq qaýipsizdik turǵysynan Siriia nemese Venesýeladaǵy jaǵdaidan áldeqaida mańyzdy ekenin aitty.
"Armeniiadan aiyrylý - asa úlken másele. Aziiadaǵy, naqtyraq aitqanda ózderi Ortalyq Aziia dep ataityn óńirdegi túitkilder - biz úshin aýqymdy qater. Sondyqtan maqsattarymyz ben mindetterimizdi ashyq ári naqty aiqyndaý qajet. “Oiyn aiaqtaldy” dep týra aitý kerek. Halyqaralyq quqyq pen halyqaralyq tártipke súienýdiń qajeti joq. Eger ulttyq qaýipsizdigimiz úshin Ýkrainada arnaiy áskeri operatsiia bastaýǵa májbúr bolsaq, dál osy ýájben ózimiz yqpal aimaǵy dep sanaityn basqa óńirlerde de osyndai qadamǵa barýǵa ne kedergi?", - degen edi ol.
