Qazaqstanda túnde qala kóshelerinde zańsyz jarys uiymdastyratyn kólik júrgizýshileri kóp jaǵdaida jaýapkershilikten qutylyp ketedi. Bul máseleni Quryltai depýtaty Adambek Kendebai kóterdi, dep habarlaidy dalanews.kz.
Depýtattyń aitýynsha, qalalardyń ortalyq kóshelerinde mototsikl men tiýning jasalǵan kólik júrgizýshileri ruqsatsyz jarys uiymdastyryp, jyldamdyqty arttyrady. Keibiri pirotehnikany qoldanyp, turǵyn úiler ornalasqan aýdandarda ádeii qatty shý shyǵarady.
«Bul másele jol qozǵalysy erejesin buzýdan áldeqashan asyp, qoǵamdyq qaýipsizdik máselesine ainalyp otyr. Sonymen qatar azamattardyń tynyǵýyna keri áser etip, túngi tynyshtyqty buzady. Alaida kóptegen jaǵdaida quqyq buzýshylar jaýapkershilikten qutylyp ketedi», – dedi Adambek Kendebai Quryltai otyrysynda.
Depýtat munyń birneshe sebebi bar ekenin atap ótti. Onyń aitýynsha, mundai quqyq buzýshylyqtar sirek tirkeledi jáne kóp jaǵdaida shara azamattardyń shaǵymynan keiin ǵana qabyldanady.
Osyǵan bailanysty Kendebai Ishki ister ministrligine kólik qozǵalysyn baqylaý júielerine arnaiy akýstikalyq qurylǵylar men shý ólshegishterdi biriktirip, ruqsat etilgen deńgeiden asatyn shýdy avtomatty túrde anyqtaityn pilottyq jobany iske qosýdy usyndy.
Depýtat mundai júielerdiń shetelde qoldanylatynyn atap ótti. Onyń aitýynsha, AQSh-ta avtomatty akýstikalyq kameralar paidalanylady. Keibir jaǵdailarda quqyq buzǵan kólikti tárkileý sharasy da qarastyrylǵan. Germaniia men Frantsiiada túngi reidter ótkizilip, arnaiy mobildi zerthanalar qoldanylady.
Kendebai qoldanystaǵy jaza sharalarynyń tiimdiligine de nazar aýdardy. Qazir túngi ýaqytta tynyshtyqty buzǵany úshin 5 ailyq eseptik kórsetkish, iaǵni 21 625 teńge mólsherinde aiyppul salynady.
Depýtat bul jazanyń quqyq buzýshylyqtyń aldyn alý úshin jetkilikti tiimdi bolmaýy múmkin ekenin aitty.
Ol Ishki ister ministrligine patrýldik politsiia qyzmetkerleri men ýchaskelik inspektorlardan túngi ýaqytta zańsyz jarystardy jedel toqtatatyn turaqty birlesken ekipajdar qurýdy usyndy.
Sondai-aq quqyq buzǵan kólikterdi zańsyz tehnikalyq ózgerister tolyq joiylǵanǵa deiin arnaiy turaqqa qoiý usynyldy. Bul rette kóliktiń shyǵarý júiesine zańsyz ózgerister engizilgenin tekserý kózdeledi.
Budan bólek, depýtat túngi tynyshtyqty buzǵany úshin belgilengen jazanyń azamattardyń qalypty ómirine tigizetin áserine sáikestigin qaita qaraýdy jáne joldaǵy quqyq buzýshylyqtardy usaq buzaqylyq retinde saralaýdyń naqty tártibin ázirleýdi usyndy.
Kendebai mundai jaǵdaida qoǵamǵa qurmetsizdiktiń qasaqana jáne ashyq kórinisteriniń naqty belgilerin, sondai-aq dáleldemelerdi jinaý tártibin aiqyndaý qajet ekenin aitty.
