Aqtóbede halyqaralyq izdeýde birneshe jyl boiy júrgen 50 jastaǵy Asylbek Nysanovqa qatysty úkim shyqty. Sot ony terrorizmdi nasihattady dep tanyp, segiz jylǵa bas bostandyǵynan aiyrdy, dep habarlaidy dalanews.kz.
Tergeý málimetinshe, Asylbek Nysanov 2008 jyly Saýd Arabiiasyndaǵy Mádina qalasyna ketken. Sol jerde radikaldy ideologiianyń yqpalyna túskeni anyqtalǵan. Keiin ol Telegram arqyly tanystaryna terrorizmdi jáne qarýly jihad ideiasyn nasihattaityn habarlamalar jiberip otyrǵan.
2019 jyly aqtóbelik halyqaralyq izdeýge jariialanǵan. Biyl ol ustalyp, Qazaqstanǵa jetkizildi.
Sot barysynda Nysanov kinásin tolyq moiyndap, protsestik kelisim jasaýdy suraǵan. Alaida prokýratýra bul ótinishti qoldamaǵan. Aiyptaýshy tarap sottalýshynyń terrorizmdi dáripteitin radikaldy ideologiianyń yqpalynda bolǵanyn jáne onyń áreketi beibitshilik pen qoǵamdyq qaýipsizdikke qarsy baǵyttalǵanyn málimdedi.
Sot úkimin shyǵarý kezinde aiyptalýshynyń kámeletke tolmaǵan balalarynyń bolýy men kinásin moiyndaǵany jeńildetetin mán-jai retinde eskerildi.
Sot ony Qazaqstan Respýblikasy Qylmystyq kodeksiniń 256-babynyń 2-bóligi boiynsha kináli dep tanyp, segiz jyl merzimge bas bostandyǵynan aiyrý jazasyn taǵaiyndady.
Sot otyrysy aldynda sottalýshynyń týystary da kópshiliktiń nazaryn aýdardy. Áielder sotqa bet-júzin tolyq jaýyp turatyn oramalmen kelgen. Sot hatshysy olardan júzderin ashýdy talap etti.
Aita keteiik, buǵan deiin Aqtóbede sotqa niqab kiip kelgen áielder ákimshilik jaýapkershilikke tartylǵan bolatyn.
