Sara Nazarbaeva qazirgi tańda Almaty qalasyndaǵy QR Prezidenti Is basqarmasynyń meditsinalyq ortalyǵyna qarasty Ulttyq gospitalda, el arasynda «Sovminka» degen ataýmen belgili mekemede emdelip jatyr, dep habarlaidy Dalanews.kz.
Ulttyq gospitaldyń direktory Ashat Bralovtyń aitýynsha, patsientke qajetti meditsinalyq kómektiń barlyǵy kórsetilýde. Emdeý jumystary bekitilgen standarttar boiynsha júrgizilip, Sara Nazarbaeva bilikti dárigerlerdiń turaqty baqylaýynda.
Bralovtyń sózinshe, naýqastyń diagnozy, densaýlyǵynyń jai-kúii, qoldanylyp jatqan em-dom men onyń nátijeleri dárigerlik qupiiaǵa jatady. Mundai aqparatty jariialaý tek patsienttiń ruqsatymen nemese zańmen belgilengen negizder boiynsha ǵana múmkin.
"Bul málimetterdi taratpaý týraly sheshim patsienttiń jeke ómirine qurmetpen qaraý ári em protsesine syrttan aralasýǵa jol bermeý maqsatynda qabyldandy", – dedi Ashat Bralov.
Aita keteiik, buǵan deiin áleýmettik jelide Nazarbaevtar ziratynda taǵy bir zirat paida bolǵany týraly aqparat tarady.
TikTok jelisinde taraǵan videoda avtor Bolat Nazarbaevtyń jubaiynyń, óziniń ziratyn kórsetip, jaqyn arada taǵy bir zirat paida bolǵanyn aitady.
Áleýmettik jeli qoldanýshylary bul jaǵdaidy túrlishe joryp jatyr. Keibir jeli qoldanýshylary muny Sara Nazarbaevaǵa qatysty jaǵdaimen de bailanystyrǵan.
Ákimdik jaýaby
Qarasai aýdany ákimdigi jelide tarap ketken videoǵa qatysty Tengrinews.kz basylymyna jaýap bergen.
Ákimdik málimetinshe, Nazarbaevtar áýletiniń Shamalǵan aýylyndaǵy ziratynda 2024 jyly jeltoqsanda qaitys bolǵan basqa adam jerlengen.
"Dini rásimder men dástúrlerge sai jerlendi. Qazir qabirde eshqandai jazý ne taqtaisha joq, alaida marqumnyń týystarynyń aitýynsha, jaqyn arada taqtaisha ornatylady", – dep jazylǵan ákimdik jaýabynda.
Buǵan deiingi jaǵdai
Aita keteiik, buǵan deiin Tuńǵysh Prezident Nursultan Nazarbaevtyń keńesshisi ári baspasóz hatshysy Aidos Úkibai BAQ-ta tarap jatqan aqparatqa pikir bildirip, Sara Nazarbaeva aman ekenin málimdedi.
