سارا نازاربايەۆا قازىرگى تاڭدا الماتى قالاسىنداعى ق ر پرەزيدەنتى ءىس باسقارماسىنىڭ مەديسينالىق ورتالىعىنا قاراستى ۇلتتىق گوسپيتالدا، ەل اراسىندا «سوۆمينكا» دەگەن اتاۋمەن بەلگىلى مەكەمەدە ەمدەلىپ جاتىر، دەپ حابارلايدى Dalanews.kz.

ۇلتتىق گوسپيتالدىڭ ديرەكتورى اسحات برالوۆتىڭ ايتۋىنشا، پاسيەنتكە قاجەتتى مەديسينالىق كومەكتىڭ بارلىعى كورسەتىلۋدە. ەمدەۋ جۇمىستارى بەكىتىلگەن ستاندارتتار بويىنشا جۇرگىزىلىپ، سارا نازاربايەۆا بىلىكتى دارىگەرلەردىڭ تۇراقتى باقىلاۋىندا.

برالوۆتىڭ سوزىنشە، ناۋقاستىڭ دياگنوزى، دەنساۋلىعىنىڭ جاي-كۇيى، قولدانىلىپ جاتقان ەم-دوم مەن ونىڭ ناتيجەلەرى دارىگەرلىك قۇپياعا جاتادى. مۇنداي اقپاراتتى جاريالاۋ تەك پاسيەنتتىڭ رۇقساتىمەن نەمەسە زاڭمەن بەلگىلەنگەن نەگىزدەر بويىنشا عانا مۇمكىن.

"بۇل مالىمەتتەردى تاراتپاۋ تۋرالى شەشىم پاسيەنتتىڭ جەكە ومىرىنە قۇرمەتپەن قاراۋ ءارى ەم پروسەسىنە سىرتتان ارالاسۋعا جول بەرمەۋ ماقساتىندا قابىلداندى"، – دەدى اسحات برالوۆ.

ايتا كەتەيىك، بۇعان دەيىن الەۋمەتتىك جەلىدە نازاربايەۆتار زيراتىندا تاعى ءبىر زيرات پايدا بولعانى تۋرالى اقپارات تارادى.

TikTok جەلىسىندە تاراعان ۆيدەودا اۆتور بولات نازاربايەۆتىڭ جۇبايىنىڭ، ءوزىنىڭ زيراتىن كورسەتىپ، جاقىن ارادا تاعى ءبىر زيرات پايدا بولعانىن ايتادى.

الەۋمەتتىك جەلى قولدانۋشىلارى بۇل جاعدايدى تۇرلىشە جورىپ جاتىر. كەيبىر جەلى قولدانۋشىلارى مۇنى سارا نازاربايەۆاعا قاتىستى جاعدايمەن دە بايلانىستىرعان.

اكىمدىك جاۋابى

قاراساي اۋدانى اكىمدىگى جەلىدە تاراپ كەتكەن ۆيدەوعا قاتىستى Tengrinews.kz باسىلىمىنا جاۋاپ بەرگەن.

اكىمدىك مالىمەتىنشە، نازاربايەۆتار اۋلەتىنىڭ شامالعان اۋىلىنداعى زيراتىندا 2024 جىلى جەلتوقساندا قايتىس بولعان باسقا ادام جەرلەنگەن.

"ءدىني راسىمدەر مەن داستۇرلەرگە ساي جەرلەندى. ءقازىر قابىردە ەشقانداي جازۋ نە تاقتايشا جوق، الايدا مارقۇمنىڭ تۋىستارىنىڭ ايتۋىنشا، جاقىن ارادا تاقتايشا ورناتىلادى"، – دەپ جازىلعان اكىمدىك جاۋابىندا.

بۇعان دەيىنگى جاعداي

ايتا كەتەيىك، بۇعان دەيىن تۇڭعىش پرەزيدەنت نۇرسۇلتان نازاربايەۆتىڭ كەڭەسشىسى ءارى باسپا ءسوز حاتشىسى ايدوس ۇكىباي باق-تا تاراپ جاتقان اقپاراتقا پىكىر ءبىلدىرىپ، سارا نازاربايەۆا امان ەكەنىن مالىمدەدى.