Aýdan ákimdiginiń málimetine qaraǵanda, 2018 jyldan beri taý sportyn súietin jandarǵa qyzmet usynyp kele jatqan baza búginde shańǵy tebý jolyn 737 metrge jetkizgen. Munda 170 metrlik tiýbing-syrǵanaqtar bar. Oǵan qosa biylǵy jyly arnaiy muz aidy ashylyp otyr.
Qystyń qyzyǵynan qur qalǵysy kelmeitin kópshilik munda negizinen demalys kúnderi keledi eken.
«Bizdiń bazaǵa kirý tegin. Al konki, shańǵy, ballon siiaqty sporttyq quraldardy jalǵa alý quny arzan. Búgingi kúni demalys aimaǵynda 10-nan asa shańǵy, 3 snoýbord, 20-ǵa jýyq úrlemeli ballondar bar. Aldaǵy ýaqytta materialdyq bazamyzdy tolyqtyryp, qonaq úi, ashana, balyq aýlaityn aimaq salý josparymyzda bar», - deidi shańǵy bazasynyń direktory Erjan Amantaiuly.
Sonymen qatar jeke kásipker jaz mezgilinde sýǵa shomylýǵa arnalǵan bassein ashpaq. Oǵan shańǵy bazasynyń Terekti ózeniniń jaǵalaýynda ornalasýy múmkindik beredi.
Aita keteiik, taý shańǵy bazasyna jeltoqsan aiynan beri 300-den asa aýdan turǵyny demalyp qaitqan.
Jalpy Qazaqstan Respýblikasynyń týristik salasyn damytýdyń 2019-2025 jyldarǵa arnalǵan memlekettik baǵdarlamasy sheńberinde Almaty oblysynda 8 iri investitsiialyq qanatqaqty jobany iske asyrý kózdelgen. Sol qatarda «Oi-qaraǵai» - «Aport» - «Aqtas», «Aqbulaq» taý shańǵy kýrorttaryn keńeitý, «Túrgen» taý shańǵy kýrorty men «Park Canyon» týristik oiyn-saýyq keshenin salý jumystary belgilengen. Tartylatyn investitsiia kólemi 300 mlrd. teńgege jýyq, onyń 70 % - jeke investitsiia. Bul 5 myńdai jańa jumys ornyn qurýǵa múmkindik beredi.
