اۋدان اكىمدىگىنىڭ مالىمەتىنە قاراعاندا، 2018 جىلدان بەرى تاۋ سپورتىن سۇيەتىن جاندارعا قىزمەت ۇسىنىپ كەلە جاتقان بازا بۇگىندە شاڭعى تەبۋ جولىن 737 مەترگە جەتكىزگەن. مۇندا 170 مەترلىك تيۋبينگ-سىرعاناقتار بار. وعان قوسا بيىلعى جىلى ارنايى مۇز ايدى اشىلىپ وتىر.
قىستىڭ قىزىعىنان قۇر قالعىسى كەلمەيتىن كوپشىلىك مۇندا نەگىزىنەن دەمالىس كۇندەرى كەلەدى ەكەن.
«ءبىزدىڭ بازاعا كىرۋ تەگىن. ال كونكي، شاڭعى، باللون سياقتى سپورتتىق قۇرالداردى جالعا الۋ قۇنى ارزان. بۇگىنگى كۇنى دەمالىس ايماعىندا 10-نان اسا شاڭعى، 3 سنوۋبورد، 20-عا جۋىق ۇرلەمەلى باللوندار بار. الداعى ۋاقىتتا ماتەريالدىق بازامىزدى تولىقتىرىپ، قوناق ءۇي، اسحانا، بالىق اۋلايتىن ايماق سالۋ جوسپارىمىزدا بار»، - دەيدى شاڭعى بازاسىنىڭ ديرەكتورى ەرجان امانتاي ۇلى.
سونىمەن قاتار جەكە كاسىپكەر جاز مەزگىلىندە سۋعا شومىلۋعا ارنالعان باسسەين اشپاق. وعان شاڭعى بازاسىنىڭ تەرەكتى وزەنىنىڭ جاعالاۋىندا ورنالاسۋى مۇمكىندىك بەرەدى.
ايتا كەتەيىك، تاۋ شاڭعى بازاسىنا جەلتوقسان ايىنان بەرى 300-دەن اسا اۋدان تۇرعىنى دەمالىپ قايتقان.
جالپى قازاقستان رەسپۋبليكاسىنىڭ تۋريستىك سالاسىن دامىتۋدىڭ 2019-2025 جىلدارعا ارنالعان مەملەكەتتىك باعدارلاماسى شەڭبەرىندە الماتى وبلىسىندا 8 ءىرى ينۆەستيسيالىق قاناتقاقتى جوبانى ىسكە اسىرۋ كوزدەلگەن. سول قاتاردا «وي-قاراعاي» - «اپورت» - «اقتاس»، «اقبۇلاق» تاۋ شاڭعى كۋرورتتارىن كەڭەيتۋ، «تۇرگەن» تاۋ شاڭعى كۋرورتى مەن «Park Canyon» تۋريستىك ويىن-ساۋىق كەشەنىن سالۋ جۇمىستارى بەلگىلەنگەن. تارتىلاتىن ينۆەستيسيا كولەمى 300 ملرد. تەڭگەگە جۋىق، ونىڭ 70 % - جەكە ينۆەستيسيا. بۇل 5 مىڭداي جاڭا جۇمىس ورنىن قۇرۋعا مۇمكىندىك بەرەدى.
