Búginde Almatydaǵy jańa turǵyn úilerdiń bir sharshy metriniń ortasha baǵasy 750–850 myń teńge. Mundai baǵanyń qalai qalyptasatynyn Qazaq Expert Club qurylys salasynyń sarapshysy Diliara Seitnýrova túsindiredi, dep habarlaidy Dalanews.kz.
Sarapshynyń sózinshe, kóbine joǵary baǵany “qurylys salýshylardyń ashkózdigimen” bailanystyrady. Alaida is júzinde shamamen 800 myń teńgeni bir sharshy metrge bólip qarasaq, qarajattyń qaida jumsalatyny aiqyn kórinedi.
Eń úlken shyǵyn qurylys jumystary, 1 m² úshin 320–380 myń teńgedei jumsalady. Onyń ishinde shamamen 165 myń teńge qurylys materialdaryna (beton, armatýra, kirpish), 75 myń teńge jalaqyǵa, taǵy 30–35 myń teńge seismikalyq kúsheitýge jumsalady.
Ekinshi mańyzdy shyǵyn – jer telimi. Onyń quny 1 m² úshin 160–180 myń teńge shamasynda. Qalanyń joǵarǵy bóliginde jáne “altyn kvadratta” jerdiń úlesi jalpy qunnyń 25%-yna deiin jetedi.
Dál osy qurylys pen jerdiń quny qaladaǵy baǵa aiyrmashylyǵyn qalyptastyrady. Material men jer telimi qymbattaǵan saiyn, túpki baǵa da ósedi.
Mysaly, Alataý nemese Naýryzbai aýdandaryndaǵy ekonom-klass turǵyn úilerdiń baǵasy 1 m² úshin 480–550 myń teńge bolsa, komfort-klass – 650–780 myń teńge aralyǵynda. Abylai han dańǵylynan joǵary ornalasqan aýdandarda komfort jáne biznes-klass jańa úilerdiń baǵasy 800 myń teńgeden bastalyp, 1,5 mln teńgege deiin jetedi. Al Medeý aýdanyndaǵy elitalyq turǵyn úilerdiń baǵasy bir sharshy metr úshin 1,5 mln teńgeden bastalady.
Turǵyn úi baǵasyna qosylǵan qun salyǵynyń 12%-dan 16%-ǵa deiin ósýi de eleýli áser etip jatyr. Qazirgi tańda salyq júktemesi 1 m² úshin 144–160 myń teńge, bul jalpy qunnyń shamamen 20%-y.
Sonymen qatar qurylys salýshynyń operatsiialyq shyǵyndaryn da eskerý qajet. Mysaly, satý keńselerin ustaý, marketing pen jarnamaǵa 1 m² úshin 56–80 myń teńge jumsalady. Buǵan qosa, qurylysqa alynǵan nesieler boiynsha paiyzdyq tólemderge 40–64 myń teńge ketedi.
Nátijesinde qurylys salýshynyń taza paidasy 1 m² úshin shamamen 50–70 myń teńgeni quraidy – bul jalpy qunnyń 6–8%-y ǵana. Táýekelderdi eskersek, bul aitarlyqtai joǵary marja emes.
"Qorytyndylai kele, qazirgi baǵalar shekti deńgei emes. Atap aitqanda, jańa turǵyn keshenderdiń janynan mektepter men balabaqshalar salýǵa qurylys salýshylardan mindetti jarna engizý máselesi talqylanyp jatyr. Bul ár sharshy metrdiń ózindik qunyna qosymsha 15–20 myń teńge qosýy múmkin", – deidi sarapshy.
