Quramyna ortalyq memlekettik organdardyń basshylary, Parlament depýtattary, QHA ókilderi kirgen Úkimet komissiiasynyń basshysy Sortóbe jáne Masanchi aýyldarynda boldy, qaza tapqandardyń otbasylaryna baryp kóńil aitty.
– QR Prezidenti Qasym-Jomart Toqaev pen Úkimettiń atynan shyn qaiǵyryp kóńil aitamyz. Biz sizderdi bul qiyndyqta qaldyrmaimyz, sizderdiń qaýipsizdikterińizdi qamtamasyz etemiz. Sizderdiń otbasylaryńyzǵa kómektesemiz, memleket sizderdi qoldaityn bolady, – dedi Berdibek Saparbaev.
Qaza tapqandardyń týǵan-týystary men jergilikti turǵyndar bilikten kinálilerdi taýyp, jazaǵa tartýdy surady.
– Bul qylmyskerlik nietpen jasaldy. Beitanys adamdar aýylda júrip, úilerdi órtep, aqsha men altyn talap etip, qarýmen qorqytqan. «Úileriń órtenip jatyr, shyǵyńdar» degen. Olardyń arasynda mas adamdar boldy, – dedi turǵyndar.
Sonymen qatar vitse-premer tártipsizdik kezinde zardap shekken turǵyn úilerdi, áleýmettik jáne kommertsiialyq nysandardy aralap kórdi.
– Memleket basshysy otbasylarǵa barlyq qajetti kómekti jáne qoldaýdy kórsetýdi tapsyrdy. Komissiia quramynda indýstriia jáne infraqurylymdyq damý birinshi vitse-ministri Q.Óskenbaev bardy. Qazir mamandar keltirilgen zardapty baǵalap jatyr, barlyǵy qoldanystaǵy zańnamaǵa sáikes qalpyna keltiriletin bolady, – dedi Berdibek Saparbaev.
Sonymen qatar Úkimet komissiiasynyń músheleri jerleý rásimderine qatysty.
