Depýtattyń sózinshe, 2019-2023 jyldar aralyǵynda otandyq 100 filmge shamamen 23 mlrd. teńge bólingen. Bul qarjy 100 paiyz igerilgen. Esebi tapsyrylyp, kino da túsirilgen. Alaida nátije kóńil kónshitpeidi eken. Osy oraida Muqaev naqty mysaldar keltirdi.
"Memleket tarapynan bólinetin qarjylardyń kóbi "óz aralarynda" qalyp jatqandai kórinedi. Óitkeni Ulttyq kinony qoldaý ortalyǵynyń filmderi ne suranysqa, ne halyq tarapynan qoldaýǵa ie emes. Tipti halyq qazynasyndaǵy qarjyny milliondap qumǵa quiyp jatqandaimyz.
"Satai film túsirgen "Boksshy" filmine 900 mln. jumsalsa, kassalyq jinaq - nebári 25 mln. teńge.
Filmniń ideiasy, Olimpiada chempiony Sápiev týraly ekenin bilesizder. Biraq kino óte sapasyz ári kórermenderge áser syilai almady.
Sondai-aq, Medet film túsirgen "Leto 1941-go" otandyq kinosyna 700 mln. qarjy bólinse, onyń 2 milliony ǵana qaitarylǵan. Bul ketken shyǵynnan 350 esege az. Jáne de "Jizn" filmine 500 million ketse, nebári 650 myń teńgesi qaitqan. Mysaly, orta eseppen kinoteatrlardaǵy bilettiń baǵasy 2000 teńge bolsa, onda bul filmdi 325 adam kóripti-mis. Sonda siz bolyp, biz bolyp "Jizn" degen filmge biýdjetten jarty milliard ketirip, 325 adam kórý úshin ǵana túsirdik pe?!" - deidi ol.
Dáýlet Muqaev Táýelsizdikten beri qarai memleket qarjysyna 600-den asa film túsirilse, sonyń ishinde paidaǵa shyqqany tek "Dosmuqasan" ekenin aitty.
