دەپۋتاتتىڭ سٶزٸنشە, 2019-2023 جىلدار ارالىعىندا وتاندىق 100 فيلمگە شامامەن 23 ملرد. تەڭگە بٶلٸنگەن. بۇل قارجى 100 پايىز يگەرٸلگەن. ەسەبٸ تاپسىرىلىپ, كينو دا تٷسٸرٸلگەن. الايدا نەتيجە كٶڭٸل كٶنشٸتپەيدٸ ەكەن. وسى ورايدا مۇقاەۆ ناقتى مىسالدار كەلتٸردٸ.
"مەملەكەت تاراپىنان بٶلٸنەتٸن قارجىلاردىڭ كٶبٸ "ٶز ارالارىندا" قالىپ جاتقانداي كٶرٸنەدٸ. ٶيتكەنٸ ۇلتتىق كينونى قولداۋ ورتالىعىنىڭ فيلمدەرٸ نە سۇرانىسقا, نە حالىق تاراپىنان قولداۋعا يە ەمەس. تٸپتٸ حالىق قازىناسىنداعى قارجىنى ميلليونداپ قۇمعا قۇيىپ جاتقاندايمىز.
"Satai film تٷسٸرگەن "بوكسشى" فيلمٸنە 900 ملن. جۇمسالسا, كاسسالىق جيناق - نەبەرٸ 25 ملن. تەڭگە.
فيلمنٸڭ يدەياسى, وليمپيادا چەمپيونى سەپيەۆ تۋرالى ەكەنٸن بٸلەسٸزدەر. بٸراق كينو ٶتە ساپاسىز ەرٸ كٶرەرمەندەرگە ەسەر سىيلاي المادى.
سونداي-اق, مەدەت فيلم تٷسٸرگەن "لەتو 1941-گو" وتاندىق كينوسىنا 700 ملن. قارجى بٶلٸنسە, ونىڭ 2 ميلليونى عانا قايتارىلعان. بۇل كەتكەن شىعىننان 350 ەسەگە از. جەنە دە "جيزن" فيلمٸنە 500 ميلليون كەتسە, نەبەرٸ 650 مىڭ تەڭگەسٸ قايتقان. مىسالى, ورتا ەسەپپەن كينوتەاترلارداعى بيلەتتٸڭ باعاسى 2000 تەڭگە بولسا, وندا بۇل فيلمدٸ 325 ادام كٶرٸپتٸ-مٸس. سوندا سٸز بولىپ, بٸز بولىپ "جيزن" دەگەن فيلمگە بيۋدجەتتەن جارتى ميلليارد كەتٸرٸپ, 325 ادام كٶرۋ ٷشٸن عانا تٷسٸردٸك پە?!" - دەيدٸ ول.
دەۋلەت مۇقاەۆ تەۋەلسٸزدٸكتەن بەرٸ قاراي مەملەكەت قارجىسىنا 600-دەن اسا فيلم تٷسٸرٸلسە, سونىڭ ٸشٸندە پايداعا شىققانى تەك "دوسمۇقاسان" ەكەنٸن ايتتى.
