Densaýlyq saqtaý mınıstrligi oqýshylardyń jappaı ýlanýynan keıin Mańǵystaý oblysyndaǵy 66 mekteptiń ashanasyn tekserip, sonyń 65-inen sanıtarlyq talaptardyń óreskel buzylǵanyn anyqtady, dep habarlaıdy Dalanews.kz. 

Nátıjesinde 62 qyzmetker jumysynan shettetilip, 18 mıllıon teńge kóleminde 57 aıyppul salyndy. Sonymen qatar, 60 nusqama berilip, bir is sotqa joldandy.

Basty buzýshylyqtar mynalar:

• sanıtarlyq-epıdemıologıalyq qorytyndynyń bolmaýy;

• merzimi ótken nemese qujatsyz ónimderdi paıdalaný;

• sanıtarlyq rejımniń saqtalmaýy;

• ystyq sýdyń bolmaýy;

• qyzmetkerlerdiń medısınalyq tekseristen ótpeýi jáne densaýlyq jaǵdaıynyń kúndelikti baqylanbaýy;

• ashana qyzmetkerleri arasynan dızenterıa men stafılokokk bakterıalaryn tasymaldaýshylardyń tabylýy;

• ydys-aıaq pen qural-saımandardyń durys zalalsyzdandyrylmaýy – alynǵan synamalardyń 7,2%-ynan ishek taıaqshalary anyqtalǵan.

Sanıtarlyq-epıdemıologıalyq baqylaý komıteti tóraǵasynyń orynbasary Roza Qojapovanyń aıtýynsha, bul tekseristiń qorytyndysy mekteptegi tamaqtaný sapasynyń tómendigin, sondaı-aq jergilikti atqarýshy organdar tarapynan baqylaýdyń álsizdigin kórsetip otyr.

"Byltyr Munaıly aýdanynda 459 oqýshy ýlanǵan jaǵdaıdan sabaq alý qajet edi. Alaıda dál osyndaı zańbuzýshylyqtar taǵy da qaıtalanyp otyr. Bul mektep ákimshilikteri men bilim bólimderiniń balalar qaýipsizdigine júrdim-bardym qaraıtynyn dáleldeıdi", – dedi ol.

Tekserý barysynda brakerajdyq komısıa jumysynyń álsizdigi, mamandandyrylǵan qyzmetkerlerdiń jetispeýi jáne medısınalyq tekserýsiz qyzmetkerlerdiń jumysqa tartylýy sıaqty keleńsiz jaıttar anyqtalǵan. Mınıstrlik bul jaǵdaılardyń toptyq ýlanýdyń qaıtalanýyna sebep bolýy múmkin ekenin eskertti.

Osyǵan baılanysty Densaýlyq saqtaý mınıstri Aqmaral Álnazarova tıisti organdarǵa naqty tapsyrmalar berdi:

• Sanıtarlyq-epıdemıologıalyq baqylaý departamentine – aldyn alý sharalaryn kúsheıtip, bilim berý jáne tamaqtaný oryndarynda aqparattyq-túsindirý jumystaryn júıeli túrde júrgizý;

• Bilim basqarmasyna – mektep ashanalaryn sanıtarlyq talaptarǵa sáıkestendirýdi, qyzmet kórsetýshi uıymdardy qatań baqylaýǵa alyp, brakerajdyq komısıalardyń tıimdi jumysyn qamtamasyz etý;

• Densaýlyq saqtaý basqarmasyna – medısınalyq kitapshalardy zań talaptaryna saı rásimdeýdi qadaǵalaý, tolyq medısınalyq tekserissiz qujat berýge tyıym salý.

Eske salaıyq, 2024 jylǵy 6 qyrkúıekte Mańǵystaý oblysy Munaıly aýdanyndaǵy №8 mektepte jappaı ýlaný oqıǵasy tirkelgen edi. Oqýshylar ishtiń aýyrsynýy men dene qyzýynyń kóterilýine shaǵymdanǵan.

Al 2025 jyldyń aqpanynda osy mekteptiń ashanasynda jumys istegen tórt qyzmetker qylmystyq jaýapkershilikke tartyldy. Tekserý nátıjesinde olardyń sanıtarlyq qujattarynyń jalǵan ekeni anyqtalǵan. Sonymen qatar, zerthanalyq taldaý kezinde ashanadaǵy 10 qyzmetkerdiń altaýynyń, bir medısına qyzmetkeriniń jáne bir kásipkerdiń aǵzasynan stafılokokk bakterıasy tabyldy.