دەنساۋلىق ساقتاۋ مينيسترلىگى وقۋشىلاردىڭ جاپپاي ۋلانۋىنان كەيىن ماڭعىستاۋ وبلىسىنداعى 66 مەكتەپتىڭ اسحاناسىن تەكسەرىپ، سونىڭ 65-ىنەن سانيتارلىق تالاپتاردىڭ ورەسكەل بۇزىلعانىن انىقتادى، دەپ حابارلايدى Dalanews.kz. 

ناتيجەسىندە 62 قىزمەتكەر جۇمىسىنان شەتتەتىلىپ، 18 ميلليون تەڭگە كولەمىندە 57 ايىپپۇل سالىندى. سونىمەن قاتار، 60 نۇسقاما بەرىلىپ، ءبىر ءىس سوتقا جولداندى.

باستى بۇزۋشىلىقتار مىنالار:

• سانيتارلىق-ەپيدەميولوگيالىق قورىتىندىنىڭ بولماۋى؛

• مەرزىمى وتكەن نەمەسە قۇجاتسىز ونىمدەردى پايدالانۋ؛

• سانيتارلىق رەجيمنىڭ ساقتالماۋى؛

• ىستىق سۋدىڭ بولماۋى؛

• قىزمەتكەرلەردىڭ مەديسينالىق تەكسەرىستەن وتپەۋى جانە دەنساۋلىق جاعدايىنىڭ كۇندەلىكتى باقىلانباۋى؛

• اسحانا قىزمەتكەرلەرى اراسىنان ديزەنتەريا مەن ستافيلوكوكك باكتەريالارىن تاسىمالداۋشىلاردىڭ تابىلۋى؛

• ىدىس-اياق پەن قۇرال-سايمانداردىڭ دۇرىس زالالسىزداندىرىلماۋى – الىنعان سىنامالاردىڭ 7،2%-ىنان ىشەك تاياقشالارى انىقتالعان.

سانيتارلىق-ەپيدەميولوگيالىق باقىلاۋ كوميتەتى ءتوراعاسىنىڭ ورىنباسارى روزا قوجاپوۆانىڭ ايتۋىنشا، بۇل تەكسەرىستىڭ قورىتىندىسى مەكتەپتەگى تاماقتانۋ ساپاسىنىڭ تومەندىگىن، سونداي-اق جەرگىلىكتى اتقارۋشى ورگاندار تاراپىنان باقىلاۋدىڭ السىزدىگىن كورسەتىپ وتىر.

"بىلتىر مۇنايلى اۋدانىندا 459 وقۋشى ۋلانعان جاعدايدان ساباق الۋ قاجەت ەدى. الايدا ءدال وسىنداي زاڭبۇزۋشىلىقتار تاعى دا قايتالانىپ وتىر. بۇل مەكتەپ اكىمشىلىكتەرى مەن ءبىلىم بولىمدەرىنىڭ بالالار قاۋىپسىزدىگىنە ءجۇردىم-باردىم قارايتىنىن دالەلدەيدى"، – دەدى ول.

تەكسەرۋ بارىسىندا براكەراجدىق كوميسسيا جۇمىسىنىڭ السىزدىگى، مامانداندىرىلعان قىزمەتكەرلەردىڭ جەتىسپەۋى جانە مەديسينالىق تەكسەرۋسىز قىزمەتكەرلەردىڭ جۇمىسقا تارتىلۋى سياقتى كەلەڭسىز جايتتار انىقتالعان. مينيسترلىك بۇل جاعدايلاردىڭ توپتىق ۋلانۋدىڭ قايتالانۋىنا سەبەپ بولۋى مۇمكىن ەكەنىن ەسكەرتتى.

وسىعان بايلانىستى دەنساۋلىق ساقتاۋ ءمينيسترى اقمارال ءالنازاروۆا ءتيىستى ورگاندارعا ناقتى تاپسىرمالار بەردى:

• سانيتارلىق-ەپيدەميولوگيالىق باقىلاۋ دەپارتامەنتىنە – الدىن الۋ شارالارىن كۇشەيتىپ، ءبىلىم بەرۋ جانە تاماقتانۋ ورىندارىندا ءاقپاراتتىق-تۇسىندىرۋ جۇمىستارىن جۇيەلى تۇردە جۇرگىزۋ؛

• ءبىلىم باسقارماسىنا – مەكتەپ اسحانالارىن سانيتارلىق تالاپتارعا سايكەستەندىرۋدى، قىزمەت كورسەتۋشى ۇيىمداردى قاتاڭ باقىلاۋعا الىپ، براكەراجدىق كوميسسيالاردىڭ ءتيىمدى جۇمىسىن قامتاماسىز ەتۋ؛

• دەنساۋلىق ساقتاۋ باسقارماسىنا – مەديسينالىق كىتاپشالاردى زاڭ تالاپتارىنا ساي راسىمدەۋدى قاداعالاۋ، تولىق مەديسينالىق تەكسەرىسسىز قۇجات بەرۋگە تىيىم سالۋ.

ەسكە سالايىق، 2024 جىلعى 6 قىركۇيەكتە ماڭعىستاۋ وبلىسى مۇنايلى اۋدانىنداعى №8 مەكتەپتە جاپپاي ۋلانۋ وقيعاسى تىركەلگەن ەدى. وقۋشىلار ءىشتىڭ اۋىرسىنۋى مەن دەنە قىزۋىنىڭ كوتەرىلۋىنە شاعىمدانعان.

ال 2025 جىلدىڭ اقپانىندا وسى مەكتەپتىڭ اسحاناسىندا جۇمىس ىستەگەن ءتورت قىزمەتكەر قىلمىستىق جاۋاپكەرشىلىككە تارتىلدى. تەكسەرۋ ناتيجەسىندە ولاردىڭ سانيتارلىق قۇجاتتارىنىڭ جالعان ەكەنى انىقتالعان. سونىمەن قاتار، زەرتحانالىق تالداۋ كەزىندە اسحاناداعى 10 قىزمەتكەردىڭ التاۋىنىڭ، ءبىر مەديسينا قىزمەتكەرىنىڭ جانە ءبىر كاسىپكەردىڭ اعزاسىنان ستافيلوكوكك باكتەرياسى تابىلدى.