Qarjy min-niń Ishki aýdit komiteti 2020 jyly «Samuryq-Energoǵa» qarasty «Ereymentau Wind Power» JShS quny 26,1 mlrd teńgeni quraityn 50 MVt-tyq jel elektr stansasyn salý úshin tender ótkizip, nátijesinde jeńimpaz atanǵan «Olimp Trans Servis» seriktestigi aqshanyń jartysynan kóbin qaltaǵa basyp, mindetin oryndamaǵanyn habarlady.
Komitettiń habarlaýynsha, seriktestik memlekettiń 15 mlrd teńgesin talan-tarajǵa salyp, ýáde etken jel elektr stansasyn salmaǵan.
Kelisim-shartqa sai Aqmola oblysynyń aýmaǵynda salynýy tiis jel elektr stansasy 2021 jyldyń 4 maýsymynda, iaǵni, 17 aidyń ishinde qoldanysqa berilýi kerek edi. Biraq jel elektr stansasynyń qara-qurasy da joq. 2020 jyly merdigerge 10,5 mlrd teńgeni quraityn avanstyq tólemdi «Ereymentau Wind Power» JShS-y tolyq kólemde tólegen.
Arada birshama ýaqyt ótkesin atalǵan kompaniia jelden qýat kózin óndiretin 11 qondyrǵyny elge jetkizý úshin kelisim-shartta kórsetilgen avanstyq tólemniń az ekenin aityp, onyń mólsherin kóbeitýdi talap etken.
Budan keiin tapsyrys berýshi merdigerdiń kelisim-shartqa qaishy keletin talabyna nazar aýdarmastan, taǵy da 5,5 mlrd teńgeni aýdara salǵan. Merdiger qosymsha qarjy alsa da kelisim-shartta kórsetilgen óziniń mindettemesin múlde oryndamaǵan.
«Samuryq-Energoǵa» qaraityn «Ereymentau Wind Power» kompaniiasy merdigerdiń aitqanyna kónip, kelisim-shartta kórsetilgen avanstyq tólem talabyn buzǵasyn, jobany saqtandyrýshy kompaniia olarǵa saqtandyrý tólemin tóleýden bas tartqan.
Komitet memleket qarajatyn qaitarýǵa qatysty eshqandai jumystar júrip jatpaǵanyn alǵa tartty.
Al «Samuryq-Qazyna» ál-aýqat qory óziniń enshiles kompaniiasyna anyqtalǵan zańbuzýshylyqty joiyp, bul iske qatysy bar tulǵalardy anyqtaýdy tapsyrǵan. Bolǵan-bitkeni osy.
Osylaisha «Samuryq-Energonyń» jasyl energetikany damytýǵa qatysty bir jobasy sátsizdikke ushyrap, birde-bir jel elektr stansasy salynbady.
Budan keiin «Samuryq-Qazynanyń» AES salýǵa ideiasyn halyq qalai qoldaidy? AES salýǵa bólingen memleket qarjysy ustaǵannyń qolynda, tistegenniń aýzynda ketpeidi degenge kim senedi?
Osyndai áreketter el azamattarynyń bilikke degen senimin joǵaltatyny anyq. Al ony oilap, bas qatyrǵan «Samuryq-Qazyna» qoryn baiqamadyq!
Halyq aldyndaǵy repýtatsiiaǵa nuqsan kelse, ony qaitadan jóndep alatyn kólik emes ekenin qor basshysy Nurlan Jaqypov nege túsinbeidi?!
Osydan-aq «Samuryq-Qazynanyń» ieginiń astynda ne bolyp jatqanyn kórmeitin, sezbeitin ebedeisiz qurylymǵa ainalǵanyn baiqaýǵa bolady.
Qorda enshiles kompaniialardyń nemen ainalysyp jatqanyn qadaǵalaityn júzdegen menedjer bar. Olar «Ereymentau Wind Power» JShS-nyń kelisim-sharttaǵy aldyn-ala tólem máselesin buzýyna qalaisha jol berdi degen saýal týyndaidy.
Suraq kóp jaýap joq.
Memlekettiń qarjysyn jelge shashatyn kompaniianyń bizge qajeti qansha? Osy jaittan keiin «Samuryq-Qazynany» tarqatyp, onyń quziretin ministrlikterge bólip berý kerek ekenin baiqaisyń...
Memlekettiń qarjysyn jelge shashatyn kompaniianyń bizge qajeti qansha? Osy jaittan keiin «Samuryq-Qazynany» tarqatyp, onyń quziretin ministrlikterge bólip berý kerek ekenin baiqaisyń...
