قارجى ءمين-نىڭ ىشكى اۋديت كوميتەتى 2020 جىلى «سامۇرىق-ەنەرگوعا» قاراستى «Ereymentau Wind Power» ج ش س قۇنى 26،1 ملرد تەڭگەنى قۇرايتىن 50 مۆت-تىق جەل ەلەكتر ستانساسىن سالۋ ءۇشىن تەندەر وتكىزىپ، ناتيجەسىندە جەڭىمپاز اتانعان «وليمپ ترانس سەرۆيس» سەرىكتەستىگى اقشانىڭ جارتىسىنان كوبىن قالتاعا باسىپ، مىندەتىن ورىنداماعانىن حابارلادى.
كوميتەتتىڭ حابارلاۋىنشا، سەرىكتەستىك مەملەكەتتىڭ 15 ملرد تەڭگەسىن تالان-تاراجعا سالىپ، ۋادە ەتكەن جەل ەلەكتر ستانساسىن سالماعان.
كەلىسىم-شارتقا ساي اقمولا وبلىسىنىڭ اۋماعىندا سالىنۋى ءتيىس جەل ەلەكتر ستانساسى 2021 جىلدىڭ 4 ماۋسىمىندا، ياعني، 17 ايدىڭ ىشىندە قولدانىسقا بەرىلۋى كەرەك ەدى. ءبىراق جەل ەلەكتر ستانساسىنىڭ قارا-قۇراسى دا جوق. 2020 جىلى مەردىگەرگە 10،5 ملرد تەڭگەنى قۇرايتىن اۆانستىق تولەمدى «Ereymentau Wind Power» جشس-ى تولىق كولەمدە تولەگەن.
ارادا ءبىرشاما ۋاقىت وتكەسىن اتالعان كومپانيا جەلدەن قۋات كوزىن وندىرەتىن 11 قوندىرعىنى ەلگە جەتكىزۋ ءۇشىن كەلىسىم-شارتتا كورسەتىلگەن اۆانستىق تولەمنىڭ از ەكەنىن ايتىپ، ونىڭ مولشەرىن كوبەيتۋدى تالاپ ەتكەن.
بۇدان كەيىن تاپسىرىس بەرۋشى مەردىگەردىڭ كەلىسىم-شارتقا قايشى كەلەتىن تالابىنا نازار اۋدارماستان، تاعى دا 5،5 ملرد تەڭگەنى اۋدارا سالعان. مەردىگەر قوسىمشا قارجى السا دا كەلىسىم-شارتتا كورسەتىلگەن ءوزىنىڭ مىندەتتەمەسىن مۇلدە ورىنداماعان.
«سامۇرىق-ەنەرگوعا» قارايتىن «Ereymentau Wind Power» كومپانياسى مەردىگەردىڭ ايتقانىنا كونىپ، كەلىسىم-شارتتا كورسەتىلگەن اۆانستىق تولەم تالابىن بۇزعاسىن، جوبانى ساقتاندىرۋشى كومپانيا ولارعا ساقتاندىرۋ تولەمىن تولەۋدەن باس تارتقان.
كوميتەت مەملەكەت قاراجاتىن قايتارۋعا قاتىستى ەشقانداي جۇمىستار ءجۇرىپ جاتپاعانىن العا تارتتى.
ال «سامۇرىق-قازىنا» ءال-اۋقات قورى ءوزىنىڭ ەنشىلەس كومپانياسىنا انىقتالعان زاڭبۇزۋشىلىقتى جويىپ، بۇل ىسكە قاتىسى بار تۇلعالاردى انىقتاۋدى تاپسىرعان. بولعان-بىتكەنى وسى.
وسىلايشا «سامۇرىق-ەنەرگونىڭ» جاسىل ەنەرگەتيكانى دامىتۋعا قاتىستى ءبىر جوباسى ساتسىزدىككە ۇشىراپ، بىردە-بىر جەل ەلەكتر ستانساسى سالىنبادى.
بۇدان كەيىن «سامۇرىق-قازىنانىڭ» اەس سالۋعا يدەياسىن حالىق قالاي قولدايدى؟ اەس سالۋعا بولىنگەن مەملەكەت قارجىسى ۇستاعاننىڭ قولىندا، تىستەگەننىڭ اۋزىندا كەتپەيدى دەگەنگە كىم سەنەدى؟
وسىنداي ارەكەتتەر ەل ازاماتتارىنىڭ بيلىككە دەگەن سەنىمىن جوعالتاتىنى انىق. ال ونى ويلاپ، باس قاتىرعان «سامۇرىق-قازىنا» قورىن بايقامادىق!
حالىق الدىنداعى رەپۋتاسياعا نۇقسان كەلسە، ونى قايتادان جوندەپ الاتىن كولىك ەمەس ەكەنىن قور باسشىسى نۇرلان جاقىپوۆ نەگە تۇسىنبەيدى؟!
وسىدان-اق «سامۇرىق-قازىنانىڭ» يەگىنىڭ استىندا نە بولىپ جاتقانىن كورمەيتىن، سەزبەيتىن ەبەدەيسىز قۇرىلىمعا اينالعانىن بايقاۋعا بولادى.
قوردا ەنشىلەس كومپانيالاردىڭ نەمەن اينالىسىپ جاتقانىن قاداعالايتىن جۇزدەگەن مەنەدجەر بار. ولار «Ereymentau Wind Power» جشس-نىڭ كەلىسىم-شارتتاعى الدىن-الا تولەم ماسەلەسىن بۇزۋىنا قالايشا جول بەردى دەگەن ساۋال تۋىندايدى.
سۇراق كوپ جاۋاپ جوق.
مەملەكەتتىڭ قارجىسىن جەلگە شاشاتىن كومپانيانىڭ بىزگە قاجەتى قانشا؟ وسى جايتتان كەيىن «سامۇرىق-قازىنانى» تارقاتىپ، ونىڭ قۇزىرەتىن مينيسترلىكتەرگە ءبولىپ بەرۋ كەرەك ەكەنىن بايقايسىڭ...
مەملەكەتتىڭ قارجىسىن جەلگە شاشاتىن كومپانيانىڭ بىزگە قاجەتى قانشا؟ وسى جايتتان كەيىن «سامۇرىق-قازىنانى» تارقاتىپ، ونىڭ قۇزىرەتىن مينيسترلىكتەرگە ءبولىپ بەرۋ كەرەك ەكەنىن بايقايسىڭ...
