Qyrkúiek aiynan bastap Qazaqstannyń fiskaldyq organdary azamattardyń jeke bank shottaryna túsetin barlyq qarajatty, sonyń ishinde shetel valiýtasyndaǵy aýdarymdardy da muqiiat qadaǵalai bastady. Bul shara Mobildi aýdarymdardy baqylaýdyń jańa tetigin engizýge bailanysty júzege asyrylyp otyr, dep habarlaidy Dalanews.kz digitalbusiness-ke silteme jasap.
Memlekettik kirister komitetiniń (MKK) jańa júiesine sáikes, endi bankter tek teńgemen ǵana emes, valiýtamen jasalǵan barlyq aýdarymdar týraly derekterdi jinap, biriktirip otyrady.
Baqylaý barlyq aýdarymdardy qamtidy
MKK resmi túrde valiýtalyq shottar da baqylaýǵa alynǵanyn rastady. Bul salyq organdary azamattardyń barlyq qarjylyq operatsiialaryn tekserýge kirisedi degen sóz. Eger mundai baqylaý bolmaǵanda, túrli bankterdegi shottar arqyly qarajatty «bólip salý» arqyly tabysty jasyrý múmkindigi týar edi.
Salyq salasynyń sarapshysy Aidar Masatbaev bul júieniń tehnikalyq turǵyda tek bir jaǵdaida ǵana: eger bankter ózara barlyq aýdarymdar týraly málimetpen bólisse ǵana iske asatynyn aitty.
«Bir oi meni mazalaidy: Kaspi shotyma 99 adam aqsha jibergen, al Halyk-taǵy shotyma taǵy úsheý. Bul eki bank bir-birimen aqparat almaspaidy. Demek, barlyq bankterdegi aýdarymdardy biriktirip sanaý úshin derekterdi MKK-de jinaqtaý qajet bolady. Áitpese, júie tolyq jumys istemeidi. Bankter óz júielerindegi derektermen ǵana shekteledi, basqa bankterge qol jetkize almaidy. Sondyqtan barlyq aýdarymdardy biriktirý tek bir jolmen múmkin – eger ár bank barlyq málimetti salyq organdaryna usynsa», – deidi Masatbaev.
12 AEK-ten assa – salyq tekserýi bastalady
Jańa talap boiynsha, eger úsh ai qatarynan bir shotqa túsetin jalpy soma 12 ailyq eseptik kórsetkishten (2025 jyly shamamen 1 million teńge) asyp ketse, bank sol shot iesi týraly málimetti salyq komitetine joldaýǵa mindetti.
Sonymen qatar, erekshe nazar azamattardyń shotyna úsh ai qatarynan 100 jáne odan da kóp túrli jiberýshiden aqsha túsken jaǵdailarǵa aýdarylady (mysaly, shildede – 100, tamyzda – 103, qyrkúiekte – 106 aýdarym).
Tipti bul dostardan, týystardan nemese klientterden túsken qarajat bolsa da, eger iesiniń kásipker retinde tirkelýi joq bolsa, salyq organdary muny jasyryn kásipkerlik qyzmettiń belgisi dep baǵalaýy múmkin.
Kameraldyq baqylaý men túsindirý kezeńi
Osyndai jaǵdai anyqtalsa, salyq organdary kameraldyq baqylaý bastaidy. Azamatqa resmi habarlama jiberiledi. Keiin ol ne jeke kásipker retinde tirkelýge, ne qarajattyń qaidan túskenin dáleldeitin qujattar usynýǵa mindetti bolady.
