Memleket basshysy 7 qańtarda otandyq biznes ókilderimen ótken kezdesýde Úkimetke qosymsha qun salyǵy máselesin taǵy da pysyqtaýdy tapsyrdy. Májilis depýtaty Ashat Aimaǵambetov osy tapsyrmaǵa qatysty pikir bildirdi, - habarlaidy Dalanews.kz.
Toqaevtyń málimdemesi
"Kez kelgen reformany jan-jaqty saraptap, baiyppen júrgizgen jón. Ekonomika salalarynyń erekshelikterin eskere otyryp, túrli nusqalardy ázirleý kerek. Qosymsha qun salyǵyna qatysty buǵan deiin kózqarasymdy bildirmegen edim. Óitkeni qyzmettik dárejeme sáikes, meniń árbir sózim, pikirim qatań tapsyrma siiaqty qabyldanady. Soǵan qaramastan bul másele boiynsha oiymdy jetkizgim keledi. Qalai desek te, qosymsha qun salyǵynyń mólsherlemesi saralanyp belgilenýge tiis", - dedi Memleket basshysy.
Prezident Úkimet túpkilikti sheshimdi bilikti sarapshylardyń, kásipkerlerdiń, álbette depýtattardyń pikirine qulaq asa otyryp, naqty esepteýler negizinde qabyldaǵany durys ekenin de naqtylady.
"Bir anyǵy, Úkimettiń qazirgi usynyp otyrǵan mólsherlemesi tym joǵary. Sizder naqty tsifrdy aittyńyzdar. Ony qoǵam qyzý talqylady. Tipti, kei jaǵdaida artyq sózder de aityldy. Degenmen, bul qoǵam talqysyna aldyn ala salynǵan usynys bolatyn. Taǵy qaitalap aitamyn, Úkimettiń bul baǵyttaǵy jumysy biznes, qoǵam, kásipkerler, sarapshylardyń, iaǵni barlyq taraptyń pikiri eskerile otyryp jalǵasýy kerek. Biyl naqty sheshim qabyldanýǵa tiis. Men buǵan deiin de aittym: Úkimet bul máseleni depýtattarmen jáne sarapshylarmen egjei-tegjeili talqylaýy kerek. Búgin aitylǵan oi-pikirler de eskeriledi. Memleketke barynsha ońtaily sheshim qajet. Iaǵni bir jaǵynan biznes júrgizýge kedergi keltirmei, qolaily jaǵdai jasaityn, al ekinshi jaǵynan, salyqqa qatysty tártipti kúsheitip, biýdjet kirisin arttyratyn tiimdi joldy tabýymyz qajet", – dedi Qasym-Jomart Toqaev.
Búǵan deiin kásipkerler birlesken otyrys ótkizip, onyń qorytyndysy boiynsha qosymsha qun salyǵynyń 20 paiyzǵa kóterilýine qarsy ekenin jariialaǵan bolatyn.
Depýtat Aimaǵambetovtiń pikiri
Májilis depýtaty Ashat Aimaǵambetov osy málimdege orai pikir bildirdi.
"Prezident Qasym-Jomart Toqaev Úkimetke QQS mólsherlemesin kóterý týraly usynysty qaita qaraýdy tapsyrdy. Prezidenttiń ustanymy anyq: QQS-tyń qazirgi usynylǵan mólsherlemesi tym joǵary. Úkimet sheshimdi naqty esepteýler men taldaýlarǵa súiene otyryp qabyldaýy tiis. Kásipkerler men depýtattardyń pikiri eskerilýi kerek. Bul sheshim biznes júrgizýge kedergi keltirmei, qolaily jaǵdai jasap, salyq tártibin kúsheitip, biýdjet kirisin arttyrýy tiis. Shaǵyn jáne orta biznestiń damýy – ekonomikanyń tiregi. Salyq reformasy bul sektordy qoldaýǵa baǵyttalýy kerek", - dedi ol.
Buǵan deiin de depýtat Salyq kodeksiniń jobasyna qandai túzetýler engizilip jatqanyn aitqan edi. Sonyń ishinde QQS máselesi de kóterildi.
"Bank operatsiialaryna QQS (NDS) engizýdi boldyrmaý. Úkimettiń banktik aýdarymdar men basqa da bank operatsiialaryna QQS engizý usynysy aqylǵa qonymsyz. Qazirdiń ózinde bankter arasyndaǵy aýdarymdar quny, QQS engiziledi degen boljammen ósip jatyr. QQS qosylsa, bul bankterdiń emes, qarapaiym azamattardyń shyǵyndaryn odan ári arttyrady. Biz bul normany qabyldamaýdy jáne negizgi qarjylyq qyzmetterdiń baǵasynyń ósýine jol bermeýdi usyndyq", - dedi depýtat buǵan deiin.
