– Ái, bir jas bala paida bolypty ǵoi kóshede, aiaǵy aýyra ma, súrine beredi, – dedim úige kirgen soń áielime.
– Qandai bala? – dedi ol. Osyndai-osyndai oramal taqqan dep sipattap jatyrmyn ǵoi. Áielim betin shymshydy:
– Sizdiki uiat bolypty, ol ana tómengi úige túsken kelin ǵoi, sizge sálem salyp júr eken, bata berýińiz kerek, – dedi.
Qyzdary kerek bolsa ózińe sálem saldyryp jiberetin orysy kópteý aýylda ósken meniń kózim atyzdai boldy.
– Qandai bata?
– Baqytty bol, Allanyń nury jaýsyn, úbirli-shúbirli bol, degendei jaqsy sóz kóp qoi.
– Ói, qoi, ait maǵan sálem salmai-aq qoisyn.
– Jaraidy.
Kelinshegim aitqanymen jas kelin sálem salǵanyn qoimady. Aqyry bata berýge májbúr boldym. Osydan keiin áýezdep shubyrtyp turyp bere bastadym. Osydan keiin basqa kelinderdiń sálem salǵan-salmaǵanyn qaraityn boldym. Kóshedegi úlkenderdiń barlyǵy ózderin qaiynaǵa, qaiynata, qaiynapa sezinip, túzelip qaldy. Álgi bala kele jatsa sálem salyp úlgermesten batany shubyrtyp jónelemin. Jumystan keiin úi janynda otyryp bir-bir shisha syra isheiik deitin aǵalar bul ádetin sap tyidy. Bir kelin bir aýyldy túzedi. Keiin ata-enesi jastardy bólek shyǵardy. Kóp kórmeitin boldyq.
Ótkende kólikten túseiin dep jatsam belesebet mingen bir kishkentai bala esikti ashtyrmastai entelep «Assalaýmaǵaleikúm» dep qolyn soza amandasyp jatyr. «Úi, ainalaiyn, ýaǵaleikúmassalam, kimniń balasysyń?» dep basynan sipadym.
Áke-sheshesin atady. Álgi sypaiy jigit pen izetti kelinniń uly eken. Ata-ájesine qonaqqa kelipti. Qaqpany ashqan áielime: «Qazaqy iba men inabatty sińirip ósken bala osyndai bolady» dedim riza bolyp.
Osy kezde qaraǵa oranǵan bir áiel aman-sálemsiz zý etip óte shyqty. Buryn bet-aýzyn japqan mundai adamdy úi mańynan kórmeppin. Meniń tańyrqai qaraǵanymdy baiqaǵan kelinshegim. «Arǵy kóshege túsken túsken jas kelin ǵoi, ótkende qutty bolsyn aityp barǵanda erkekter bar eken dep, aqsaqaldarǵa shai da quimai qoidy» dep jymidy.
On bes-aq jyl ótti ǵoi...
Serik ÁBIKENULY, jýrnalist.
