Saiasattanýshy Ǵaziz Ábishev Qyrǵyzstan prezidentiniń baspasóz hatshysy kótergen Qazaqstan men Qyrǵyzstan arasyndaǵy jer telimderin aiyrbastaý máselesine pikir bildirdi, dep habarlaidy dalanews.kz.
Onyń aitýynsha, sóz Toqmaq qalasy mańyndaǵy uzyndyǵy shamamen 800 metr bolatyn aýmaq týraly bolyp otyr. Bul jer Qyrǵyzstanǵa aqyly avtojol salý úshin qajet. Qyrǵyz tarapy Qazaqstanǵa quny birdei jer telimderimen aiyrbastaý jóninde usynys jasaǵan.
Ǵaziz Ábishevtiń pikirinshe, Qazaqstan bul usynystan bas tartýy yqtimal.
Saiasattanýshynyń aitýynsha, Qazaqstan úshin aýmaqtyq tutastyq máselesi – asa mańyzdy ári talqylaýǵa jatpaityn taqyryp. El táýelsizdik alǵannan keiin memlekettik shekarany zańdyq turǵyda bekitý úshin aýqymdy jumys júrgizildi. Sol kezeńde árbir sharshy shaqyrym muqiiat qaralyp, keibir jerler boiynsha ózara kelisim jasalsa, keibirinde Qazaqstan óz ustanymyn qorǵap qaldy.
Ol búginde Qazaqstannyń barlyq memlekettik shekarasy tolyq delimitatsiialanyp, demarkatsiialanǵanyn, halyqaralyq-quqyqtyq rásimder aiaqtalǵanyn atap ótti. Sondyqtan bul máseleni qaita kóterýdiń, tipti birneshe sharshy shaqyrym úshin bolsa da, eshqandai qajettiligi joq dep sanaidy.
Ábishev sondai-aq Qazaqstan men Qyrǵyzstan arasynda aýmaqtyq daý joq ekenin eske saldy. Eki el arasyndaǵy memlekettik shekara, sondai-aq Ózbekstan jáne Qytaimen túiisetin shekara núkteleri tolyq kelisilgen.
Sarapshynyń pikirinshe, Qazaqstan Konstitýtsiiasynda da memlekettik shekaranyń qol suǵylmastyǵy men el aýmaǵynyń bólinbeitindigi naqty bekitilgen.
Onyń aitýynsha, mundai usynysty qabyldaý bolashaqta qaýipti pretsedent qalyptastyrýy múmkin. Eger Qazaqstan bir memleketpen shekarany qaita qaraýǵa kelisse, keiin dál osyndai talaptardy basqa elder de qoiýy yqtimal.
«Jer men aýmaq máselesi – memleketter arasyndaǵy turaqtylyqtyń negizi. Bul – talqylaýǵa bolmaityn másele», – dep túiindedi Ǵaziz Ábishev.
Eske salaiyq, buǵan deiin Qyrǵyzstan Qazaqstanǵa shekaradaǵy jer telimderin aiyrbastaýdy usynǵan bolatyn.
Qyrǵyzstan prezidentiniń baspasóz hatshysy Ashat Alagózovtiń aitýynsha, joldyń uzyndyǵy shamamen 150 shaqyrym bolady. Áńgime Toqmaq mańyndaǵy uzyndyǵy 800 metr bolatyn ýchaske týraly bolyp otyr.
